ئه‌بووبه‌کری موده‌ڕڕه‌سی چاوه‌ڕوانی چی ده‌کا؟ حەمە موهتەدی

Abubakr-Modaresiله‌نووسراوه‌یه‌کی کورتدا، به‌ ناوی “گشتمان چاوه‌ڕوانین” ئه‌بووبه‌کری موده‌ڕڕه‌سی که‌ وادیاره‌ به‌دوای لێکترازانی حیزبه‌نیوه‌چڵه‌که‌یدا، بووه‌ته‌ که‌سی دووهه‌می “حیزبی کۆمه‌ڵه‌ی کوردستانی ئێران” و خه‌ریکن داره-داره‌ی کوردایه‌تیی پێده‌که‌ن، بنه‌مایه‌کی فه‌لسه‌فیی بۆ سیاسه‌تی چاوه‌ڕوانیی حیزبه‌که‌ی، له‌مه‌ڕ هێرشی نیزامیی ئامریکا بۆ سه‌ر ئێران به‌دی کردووه‌ و ده‌ڵێ:
“چاوه‌ڕوانی، تایبه‌تمه‌ندییه‌کی جیانه‌کراوه‌ی به‌شه‌رییه. به‌ڕاستی ده‌کرێ تاکێک له‌ڕووی ئه‌و سه‌ر گۆی زه‌وییه ‌په‌یدا بکه‌ی که ‌ئاره‌زووی گه‌وره‌ی هه‌بێت و چاوه‌ڕوان نه‌بێت؟”.

موده‌ڕڕه‌سی ئاره‌زووه‌ گه‌وره‌که‌ی شه‌رح ده‌کا و ده‌نووسێ:

“چاوه‌ڕوانی ئه‌وانه‌ وا له‌سه‌ر بیروباوه‌ڕیان، به‌هۆی خه‌بات بۆ ئامانجی مه‌زن شاربه‌ده‌ر کراون، بۆئه‌وه‌ی هه‌لێکی له‌بار بڕه‌خسێ و بگه‌ڕێنه‌وه ‌ناو خه‌ڵکه‌که‌یان وشاروگونده‌کانیان، چاوه‌ڕانیی خه‌باتکارانێک که‌ ساڵه‌هایه‌ خه‌بات ده‌که‌ن بۆ ئه‌وه‌ی دۆخێکی له‌بار بێته‌پێش و بتوانن گورزی ئاخر و کوشه‌نده ‌له‌زاڵمان وداپڵۆسێنه‌رانی خه‌ڵک بوه‌شێنن وتام و به رامی شیرنی سه ر که وتن بچێژن“

(خه‌تی ژێر تێکسته‌که‌ هی منه‌)

تا ئێره‌، ئاره‌زووی ئه‌م “خه‌باتکارانه” بریتییه ‌له ‌سازبوونی هه‌لی‌ له‌بار و مه‌رجی ڕه‌خساو، تا ئه‌وان بگه‌ڕێنه‌وه ‌بۆ شار و گونده‌کانیان و گورزی ئاخر له‌جه‌سته‌ی زاڵمان بده‌ن! دیاره‌ ئه‌م هه‌لومه‌رجه‌ش ده‌بێ بخوڵقێ و بڕه‌خسێ نه‌ک بیخوڵقێنی و بیڕه‌خسێنی!

– گه‌ڕانه‌وه‌ی کاک ئه‌بووبه‌کر و باقی “خه‌باتکارانی” ئاره‌زوومه‌ند و چاوه‌ڕوان، خۆی له‌خۆیدا هه‌ڵگری هیچ چه‌شنه ‌بیروبوچوونێکی خه‌باتکارانه‌ نییه‌، و زیاتر له‌ئاره‌زووی ئینسانی داماو و وڕه‌‌زی ته‌بعیدکراو ده‌چێ که‌ سه‌ودای گه‌ڕانه‌وه ‌بۆ وڵاتیان له‌سه‌ر دایه و، بۆ گه‌ڕانه‌ویان چاوه‌ڕوانی ئه‌م هه‌لومه‌رجه‌ن که ‌کاک ئه‌بووبه‌کر باسی ده‌کا. هه‌موو هونه‌ری ئه‌م قه‌تعه “فه‌لسه‌فی” و “حه‌ماسییه” له ‌وه‌شاندنی “گورزی نیهایی” دا خۆی ده‌نۆینی! به‌ڵام مه‌علووم نییه ‌ئه‌گه‌ر قه‌رار وابێ که‌سانی دیکه‌ یان هێز و لایه‌نی دیکه‌ ئاماده‌کاری بکه‌ن و دۆخی له‌بار بڕه‌خسێنن، بۆچی له‌ کۆتایی کاره‌که‌دا و هه‌نگاوێکی بمێنێ بۆ سه‌رکه‌وتن، گورزه‌که ‌ده‌ده‌نه‌ ده‌ست موده‌ڕڕه‌سی و هه‌ڤاڵانی؟!

– له‌به‌ر ئه‌وه‌ی کاک ئه‌بووبه‌کر، له‌جوابدانه‌وه‌ به‌ ڕه‌خنه‌ی سه‌ره‌کی که‌بریتییه ‌له ‌چاوه‌ڕوانی بۆ هێرشی نیزامیی ئامریکا بۆ سه‌ر ئیران، خۆ ده‌پارێزێ و به‌ئاڵدم و ساڵدم و حیکایه‌تی فه‌لسه‌فی باسه‌که ‌ده‌گۆڕێ، به‌ پێویستی ده‌زانم ئه‌و به‌شه‌ی قسه‌کانی ناوبراو که‌ ‌ده‌ڵی: “چاوه‌ڕوانیی خه‌باتکارانێک که ‌ساڵه‌هایه ‌خه‌بات ده‌که‌ن بۆ ئه‌وه‌ی دۆخێکی له‌بار بێته‌پێش و بتوانن گورزی ئاخر و کوشه‌نده ‌له‌زاڵمان و داپڵۆسێنه‌رانی خه‌ڵک بوه‌شێنن…” زیاتر شی بکه‌مه‌وه‌. گۆیا ئه‌م “خه‌باتکارانه”، خه‌باته‌که‌یان ڕێک هه‌ر بۆ ئه‌وه‌ ده‌ست پێکرد که‌ ڕۆژێک له‌ڕۆژان، ئامریکا هێرش بکاته ‌سه‌ر ئێران و هه‌لومه‌رجی له‌باریان بۆ بڕه‌خسێ!‎ ئه‌وه‌ به‌ته‌واوی به‌ئاوه‌ژوو نیشاندانی مێژووه. ده‌سپێکردنی خه‌بات له‌لایه‌ن خودی موده‌ڕڕه‌سی و که‌سانێک که ‌وه‌ک خه‌باتکارانی ساڵانی زوو ئاماژه‌یان پێده‌کا و له‌ڕاستیشدا ئه‌و سه‌رده‌م خه‌باتکار بوون، ده‌گه‌ڕێته‌وه بۆ ‌سه‌رده‌مێک که ‌پرۆژه‌ی “ڕۆژهه‌لاتی ناوه‌ڕاستی گه‌وره” ‌له ‌مێشک و خه‌یاڵی هیچکام له‌م که‌سانه‌دا نه‌بوو. هێشتا دونیا دوو زلهێزی تێدابوو و، کۆنه‌په‌ره‌ستی به‌م ڕاده‌یه ‌نه‌گه‌یشتبوو و ئاوا نه‌ببووه ‌باو که ‌که‌سانێک وه‌ک ئێستای موده‌ره‌سی و هاوڕێیانی، پشتئه‌ستووری به ‌کۆنه‌په‌رستترین هێزێک که‌ مێژووی به‌شه‌ر تا ئێستا به‌خۆیه‌وه ‌دیوه، به‌ ئاشکرا جاڕ بده‌ن و، ‌ئاره‌زووه‌کانی ڕزگاریی به‌شه‌ری تێدا به‌دی بکه‌ن.! له‌م سیناریۆیه‌دا، باڵی هه‌ره‌ ڕاستی کۆمارخوازه‌کانی ئامریکا که ‌ئێستا له‌ده‌سه‌ڵاتدان (بووش و دیک چه‌ینی و…) هه‌لومه‌رجی له‌بار ده‌ڕه‌خسێنن، حیزبی کۆمه‌ڵه‌ی کوردستانی ئێران گورزی ئاخر ده‌وه‌شێنێ، خه‌ڵکێش تام و به‌رامی شیرینی سه‌رکه‌وتن ده‌چێژن!!! به‌ڕاستی دونیایه‌کی سه‌یره‌ گۆڵم!

-کاک ئه‌بووبه‌کر پێی وایه ‌ئه‌م خه‌ڵکانه (که ‌به‌ڕواڵه‌ت ئاره‌زووی گه‌ڕانه‌وه‌ بۆ لایان ده‌کا به‌ڵام له‌ڕاستیدا ئه‌وه‌ی لای خۆی و حیزبه‌که‌ی بایه‌خی نه‌بێ ئه‌وانن) ده‌ستی گورز وه‌شاندنیان شکاوه؟ ئه‌مانه‌ هه‌مان خه‌ڵکانێکن که‌سه‌ره‌ڕای په‌ند و نه‌سیحه‌ته‌ “به‌جیگا”که‌ی حیزبه‌که‌ی موده‌ڕڕه‌سی ، که‌مه‌نعی مانگرتنه‌که‌یانی کرد ، له‌16ی مانگی گه‌لاوێژی دوو ساڵ له‌وه‌پێشدا، گه‌وره‌ترین و شکۆ‌دارترین شانۆی خه‌باتی جه‌ماوه‌رییان له‌کوردستانی ئێران تۆمار کرد.

-موده‌ڕڕه‌سی به‌رنامه‌ی ئێستا تا کاتی به‌دیهاتنی ئاره‌زووکه‌ی که‌بریتییه‌ له ‌وه‌شاندنی گورزی ئاخر، دیاری ده‌کا و ده‌سته‌وه‌ستان دانانیشێ. چاوه‌ڕوانیی نافه‌عالانه‌ی حیزبه‌که‌ی به‌تێکۆشان بۆ پێکهێنانی به‌ره‌یه‌کی “به‌رفراونی” “دێموکراسیخوازی” له‌گه‌ڵ به‌نی‌سه‌در (فه‌رمانده‌ی یه‌که‌مین هێرش بۆسه‌ر کوردستان)، چریکه‌کانی ‌ئه‌کسه‌رییه‌ت (هاوکاره‌کانی سپای پاسداران له‌ سه‌رکوتکردنی خه‌ڵکی کورددا) و، به ‌تازه‌یی شازاده ڕه‌زا په‌هله‌وییش به‌ لیستی هاوپه‌یمانانی دێموکساسیخواز زیاد کراوه‌‌، تێهه‌ڵدێنیته‌وه. به‌ڵام ئه‌وه‌ی مه‌عازه‌ڵا به‌مێشک و به‌ زه‌ین و به‌ قه‌ڵه‌مێشیدا نایه‌، تیکه‌ڵاوی و لایه‌نگریی له‌بزووتنه‌وه ‌کۆمه‌ڵایه‌تییه‌کانه. زمان ئامانه!!

له‌به‌رئه‌وی پێی وایه:

“نه‌ته‌وه‌ی کورد له ‌کوردستانی ڕۆژهه‌ڵات ده‌مێکه ‌بۆ ئازادی و سه‌ربه‌ستی و بۆ به‌ده‌ستهینانی مافی دیاریکردنی چاره‌نووسی خۆی خه‌بات ده‌کا و له‌و ڕێگایه دا ‌قوربانیی زۆری داوه، به‌ڵام له‌هه‌مانکاتدا به‌ئاگایه ‌که ‌ته‌نیا به‌هێزی خۆی هه‌رچه‌نده‌ش خۆبه‌خشی بکات، ناتوانێ پێشمه‌ر‌جی سه‌رکه‌وتنی خۆی که‌ بریتی بێت له ڕووخاندنی کۆماری ئیسلامی وه‌دی بێنێ“.

یه‌که‌م: ڕووخاندنی ده‌سه‌ڵاتی ڕه‌شی کۆماری ئیسلامی، ته‌نیا پێشمه‌رجی سه‌رکه‌وتنی هه‌موو خه‌ڵکی حه‌قخواز و زوڵم لێکراوی ئێرانه. ‌دووهه‌م: ئه‌گه‌ر قه‌رار بێ پشتیوان بۆ خه‌لکی کورد له‌ئێران به‌دی بکرێ( که ‌ده‌بێ بکرێ)، بۆچی ده‌بێ ئه‌م خه‌ڵکه ‌پاڵ بداته ‌پاڵ سه‌رکوتکه‌رانی پێشووی خۆی، یانی که‌سانی شێوه‌فاشیستی وه‌ک به‌نی‌سه‌در، یا هێزی دژی خه‌ڵکی و خه‌یانه‌تکاری فیداییانی ئه‌کسه‌ریه‌ت و…، به‌ڵام پشت ئه‌ستوور نه‌بێ به‌کۆمه‌ڵانێکی زوڵم لێکراو که ‌هه‌روه‌ک خه‌ڵکی کوردستان له ‌ژێر زه‌بروزه‌نگی کۆماری ئیسلامیدا ده‌ژین و خه‌بات ده‌که‌ن؟ چونکه‌ حیزبه‌که‌ی کاک ئه‌بووبه‌کر سه‌روماڵی به‌وه‌وه ‌گرێ داوه ‌که ‌هاوپه‌یمانه‌تییه‌کانی له‌گه‌ڵ سیاسه‌تی ئه‌مڕۆی ده‌سه‌ڵاتدارانی ده‌سته‌ڕاستیی باڵی کۆمارخوازانی ئه‌مریکا یه‌ک بگرێته‌وه. مه‌به‌ستیش له‌هێزی ده‌ره‌کی که‌بڕیاره ‌به ‌هانای خه‌ڵکی کورده‌وه ‌بێ ئامریکایه. واته‌ ‌به‌ره ‌سازکردن و سازنه‌کردنیش بۆ کاک ئه‌بووبه‌کر و حیزبه‌که‌ی، ده‌بێ له‌پیناو ئه‌م ئامانجه‌دا بێ.

سێهه‌م‌: وا دیاره ‌مه‌به‌ست ئه‌وه ‌نییه ‌که‌ گۆیا خه‌ڵکی کورد به‌ته‌نیا و به‌هێزی خۆی سه‌ر ناکه‌وێ، به‌لکوو قسه‌ی سه‌ره‌کی ئه‌وه‌یه ‌که‌خه‌ڵک هه‌رچه‌ندیش خۆ به‌خشی و فیداکاری بکا، به‌هێزی خۆی سه‌ر که‌وتوو نابێ، چونکه ‌سه‌ره‌ڕای پێکهێنانی به‌ره‌ی ‌به‌رفراوان، ئێستاش:

“پێکهێنانی ئه‌و هه‌لومه‌رجه ‌له‌باره ‌ته‌نیا به‌فاکته‌ره ‌ناوخۆییه‌کانه‌وه ‌گرێ نه‌دراوه، فاکته‌ره ‌ده‌ره‌کییه‌کانیش ده‌وری گه‌وره ‌و بگره ‌جاری واش هه‌یه ‌دیاریکه‌ر ده‌بینن”.

جا ئه‌مجار له‌و جارانه‌یه و، ئه‌م فاکته‌ره ‌ده‌ره‌کییه‌، هێزی ئه‌مریکایه. هه‌موو ئه‌م پینه‌وپه‌ڕۆکردن و فه‌لسه‌فه‌بافییه ‌بۆ ئه‌وه‌یه‌ که‌ ئه‌مه ڕابگه‌یه‌نێ و بڵێ کۆماری ئیسلامی به ‌فاکته‌ری ناوخۆ که ‌بریتییه ‌له ‌هێزی خه‌لک و، به‌بێ هێرشی نیزامیی ئه‌مریکا ناڕووخێ و، ‌ده‌بێ گشتمان چاوه‌ڕوانی ئه‌وکات بین. ئه‌م قسه‌یه ‌که ‌مومکینه ‌هێزی ده‌ره‌کی _ و ‌لێره‌دا ئه‌مریکا_ ئامرازی سه‌ره‌کیی ڕووخاندنی کۆماری ئیسلامی بێ نادروست نییه و، پێم وا نییه ‌که‌س ئینکاری ئه‌م ئه‌گه‌ره‌ بکات، به‌ڵام هه‌موو کێشه‌که‌ ‌له ‌سه‌ر ئه‌وه‌یه‌ که ‌حیزبی کۆمه‌ڵه‌ی کوردستانی ئێران و لێره‌دا ئه‌بووبه‌کری موده‌ڕڕه‌سی فه‌لسه‌ی ئازادیخوازی بۆ ئه‌گه‌رێکی وا وێرانکه‌ر و ڕووخێنه‌ر داده‌تاشن و چاوه‌ڕوانی ده‌که‌ن. مودڕڕه‌سی چێژی تام و به‌رامی شیرینی سه‌رکه‌وتنی له‌به‌غدا و فه‌لووجه ‌و عه‌‌ماره‌وه ‌بۆ دێ؟ یا له ‌گه‌ڕه‌کی فیرعه‌ونه‌کانی سلێمانییه‌وه‌؟ به‌ حوکمی ئه‌وه‌ی ئه‌و کورده ‌و ‌ماوه‌یه‌کیشه ‌ئه‌م چێژه‌ی له‌سلێمانی به‌سه‌ردا چووه، ‌وێده‌چێ تووره‌که‌ی زیاتر بۆ ئه‌مه ‌هه‌ڵدرووبێ! به‌ڵام هه‌ر له‌وه‌شدا به‌هه‌ڵه ‌چووه، ‌چونکه ‌نه ‌ئێران عێراقه و، ‌نه ‌کاک ئه‌بووبه‌کر و حیزبه‌که‌ی عه‌ده‌دێکن که‌ گه‌ڕه‌کی وایان بۆ بکرێته‌وه. فارس گوته‌نی:

تکیه ‌بر جای بزرگان نتوان زد به‌ گزاف

مگر اسباب بزرگی همه‌ آماده ‌کنی

له‌م باره‌یه‌شه‌وه‌ “خه‌باتکارانی” له‌م چه‌شنه ‌‌هه‌ر چاوه‌ڕوانی و ئاره‌زوویان بۆ ده‌مێنێته‌وه‌. چاوبڕینه ‌ناو بارودۆخی کوردستانی عیراق، به ‌بێ ئه‌وه‌ی بارودۆخه‌که ‌هه‌ڵسه‌نگێنی، ته‌نیا ئاره‌زووه‌که‌ت له‌دڵدا دێڵێته‌وه، ‌ئه‌گه‌ر نا، تامه‌که‌ت بۆ ناچێژرێ.

ئه‌مه‌ی که‌ ده‌گوترێ خه‌ڵک به‌هێزی خۆی هه‌ر چه‌نده‌ش خۆبه‌خش بێ ڕزگار نابێ، به‌ته‌واوی به‌پێچه‌وانه‌ی مێژووی هاوچه‌رخی ئێرانه. ‌نیزامی پاشایه‌تی له‌ئیران ڕێک به‌هێزی خه‌ڵکی ئێران ڕووخا. ڕه‌نگه‌ بگوترێ مه‌به‌ست خه‌ڵکی کوردستانه‌. لێره‌دا کاک ئه‌بووبه‌کر ناتوانێ هه‌م له‌ناڵ بدا و هه‌م له‌بزمار. به‌ره‌ی ڕزگاریبه‌خش له‌گه‌ڵ به‌نی‌سه‌در و ئه‌کسه‌ریه‌ت پێک بهێنی، به‌ڵام له‌باسه‌که‌یدا، بۆ ئه‌وه‌ی خه‌ستوخۆڵی بکاته‌وه‌و باری کوردانه‌ی زیادیی بخاته‌سه‌ر شانی، مه‌لۆتکه‌ی باکوور و باشوور و ڕۆژهه‌ڵات باوێژێ. یانی چی خه‌ڵکی کورد له ‌کوردستانی ڕۆژهه‌ڵات به‌هێزی خۆی ڕزگار نابێ؟ که‌ی قه‌رار وایه ‌ئه‌م خه‌ڵکه ‌ته‌نیا پشتئه‌ستوور به ‌هێزی خۆی بێ؟ تۆ که ‌ئه‌م هه‌مووه ‌باشوور و باکووره‌ت هێنایه ‌ناو ئه‌ده‌بییاته ‌سیاسییه‌که‌ته‌وه، ‌ده‌بێ هه‌ڵگری پرۆگرامێکی تایبه‌تیش بی بۆ ئه‌م مه‌به‌سته‌. مه‌گه‌ر کورد له‌ ئێران هاوده‌نگ و هاوخه‌بات نه‌بوو له‌گه‌ڵ هه‌موو گه‌لانی دیکه‌ی ئێران بۆ ڕووخاندنی ده‌سه‌ڵاتی پاشایه‌تی؟ مه‌به‌ست ئه‌وه‌نییه ‌که ‌خه‌لکی کورد بۆی نییه ‌و یا هه‌ڵه‌یه‌ بگۆترێ خۆی به‌هێزی خۆی بۆ مه‌رجه‌کانی سه‌ربه‌خۆیی نه‌ته‌وه‌یی خه‌بات بکا و ‌له‌م ڕێگایه‌شدا بارودۆخی گونجاو بۆ خۆی بقۆزێته‌وه. ‌به‌ڵام لانیکه‌م نووسراوه‌ی “گشتمان چاوه‌ڕوانین” وا نیشان نادا که ‌له‌م ڕێگایه‌دا هه‌نگاو هه‌ڵده‌گرێ، که‌وابێ هینانه‌گۆڕی ئه‌وه‌ی گه‌لی کورد له ڕۆژهه‌ڵات به‌ هێزی خۆی ڕزگار نابێ، له‌لایه‌که‌وه ‌واده‌نوێنێ که‌ خه‌ریکی کوردایه‌تییه‌کی خه‌ستوخۆڵن، له ‌لایه‌کی دیکه‌وه‌ ‌به‌پێکهێنانی به‌ره‌ی به‌ره‌فراوانی دێمۆکراسیخوازی له‌ ئێران له‌گه‌ڵ ئه‌و که‌س و لایه‌نانه‌ که‌پێی وایه ‌له ‌داهاتووی ئێراندا مه‌رحه‌مه‌ت و لوتفی وڵاتانی ڕۆژئاوا -به‌تایبه‌تی وڵاته‌ یه‌کگرتووه‌کانی ئه‌مریکا- ده‌یانگرێته‌وه‌، با تیرێک دوو نیشان ده‌پێکێ.

له‌ڕاستیدا ئه‌گه‌ر که‌سێک یا ڕه‌وتێکی فیکری، بنه‌مای فیکرییه‌که‌ی له‌سه‌ر ئه‌م ئه‌ساسه ‌داڕێژێ که ‌کوردستان له ‌هه‌لومه‌رجی ئێستا دا به ‌باشوور و باکوور و ڕۆژهه‌ڵات دابه‌ش بکا، ناتوانێ شیعاری ڕووخانی کۆماری ئیسلامی بدا، به‌ڵکوو شیعاره‌که‌ی ده‌بێ ڕزگاریی نه‌ته‌وه‌یی بێ و له‌ باری نه‌زه‌رییه‌وه‌، شه‌رت نییه ‌حه‌تمه‌ن به ڕووخانی کۆماری ئیسلامی به‌دی بێ. به‌لکوو ده‌بێ شیعاری ده‌رکردنی ‌هێزی داگیرکه‌ر له ‌وڵاتی کوردستان بدا. هه‌ر وه‌کوو له ڤییه‌تنام شیعاری ڕووخانی ئه‌مریکا له‌گۆڕێدا نه‌بوو. ئه‌سڵه‌ن ئه‌مه ‌به‌م مه‌عنا نییه ‌که ‌کوردستان به‌شبه‌ش نه‌کراوه ‌و یا ئه‌ساسه‌ن به‌مه‌عنای ئینکاری هه‌بوونی کۆمه‌ڵگایه‌کی یه‌کگرتوو به‌ناوی کوردستان نییه‌، به‌لکوو زیاتر مه‌به‌ست نیشاندانی ئه‌م سه‌ر لێشێواوی و سه‌ر له‌خه‌ڵک شێواندنه‌یه، که‌کوردی ته‌بعیدکراو له‌وڵاتانی ڕۆژئاوا و حیزبه‌کوردستانییه‌کان تووشی هاتوون.

له‌ ئاخری هه‌شتاکاندا بیر و باوه‌ڕی پ.کا.کا نفووزێکی زۆری کرده ‌سه‌ر زه‌ینی کوردی ئێرانیی دانیشتووی ڕۆژئاوا، به‌ڵام ‌بۆچوون و لێکدانه‌وه‌ی پ.کا.کا که ‌ده‌یگوت: “باکوور، باشوور، ڕۆژهه‌ڵات – یه‌ک خه‌بات و یه‌ک وڵات” و خۆی بۆ ڕزگاریی نه‌ته‌وه‌یی ته‌یار ده‌کرد و بۆ ئه‌مه ‌تێده‌کۆشا، مه‌عنا یه‌کی تری هه‌بو . به‌ڵام بو حیزبی فیدرالخواز (لێره‌دا من مه‌به‌ستم دژایه‌تیکردن یان لایه‌نگری له‌ ‌شیعاری فیدرالیزم، هیچکامیان نییه‌)، به‌ڵکوو ده‌مه‌وێ ئه‌مه ‌بڵێم که‌ به‌یتی ڕۆژئاوا و ڕۆژهه‌ڵات و باکوور و باشوور بۆ کاک ئه‌بووبه‌کر و حیزبه‌که‌ی، ته‌نیا مه‌سڵه‌حه‌تێکی ڕووکه‌شییانه‌ی سیاسییه‌ بۆ ڕازیکردنی ئه‌م ڕه‌وته ‌فیکرییه‌ ئاڵوزه ‌له ‌ناو کورده‌ ئێرانییه‌کانی دانیشتووی ڕۆژئاوا.

مه‌به‌ست له‌ ڕوونکردنه‌وه‌ی ئه‌م بابه‌ته، ئه‌وه ‌بوو که ‌بڵێم گوتنی ئه‌وه‌ی که‌ خه‌ڵکی کورد له‌ کوردستانیڕۆژهه‌ڵات به‌هێزی خۆی سه‌رناکه‌وێ و، دوابه‌دواشی، ئاماژه‌کردن به ‌به‌ره‌ی به‌رفراوانی”دێموکراسیخوازی” له‌ ئێران، هه‌ر هه‌موویان ڕازی ئامانج‌خوازی و چاوه‌ڕوانیی هێرشی سپای ئه‌مریکا بۆ سه‌ر ئێرانن.

ته‌نیا و ته‌‌نیا هێزی یه‌‌کگرتووی خه‌‌ڵک به‌‌بیروباوه‌ڕی پێشکه‌‌وتنخوازانه‌‌وه‌‌ ده‌‌توانێ به‌‌ری فاجیعه‌‌ی هێرشی ماڵوێرانکه‌ری ئه‌مریکا ‌‌بگرێ. مه‌‌به‌‌ست ئه‌‌وه‌‌ نییه ‌‌ئه‌‌م هێزه ‌‌ده‌‌توانێ پێشی هێرشه‌‌که ‌‌بگرێ، به‌‌ڵکوو ئه‌‌گه‌‌ر هێزێکی وا له ‌‌ساحه‌‌ی سیاسه‌تی ئێراندا نه‌‌بێ -که ‌‌به‌‌داخه‌‌وه ‌‌نییه‌- ئه‌نجام و کاریگه‌‌ریی ئه‌‌م هێرشه‌، زۆر ڕووخێنه‌‌رتر و ماڵوێرانکه‌‌رتر له ه‌ێرشه‌‌که‌‌ی عیراق ده‌‌بێ. هه‌‌ڵسه‌‌نگاندنێکی ساده‌‌ی کوردستانی عیراق له‌‌گه‌‌ڵ شوێنه‌‌کانی دیکه‌ی عێراق، نیشان ده‌‌دا هه‌‌بوونی هێزی سیاسیی چالاکی کورد له‌‌ مه‌‌یداندا، تا چ ‌‌ڕاده‌‌یه‌ک پێشی لانیکه‌‌م ئه‌و جینایه‌ت و کوشتار و ماڵویرانییه‌ی گرت که ‌‌له‌‌ شوێنه‌‌کانی دیکه ‌‌ڕۆژانه‌‌ ببوونه ‌‌ئاوێنه‌‌ی باڵانوێنی دیموکراسی نه‌‌وعی ئه‌مریکایی له ڕۆژهه‌‌ڵاتی گه‌‌وره‌‌دا. دیاره ‌‌نامه‌‌وێ مۆری ته‌ئیید له‌ ‌سه‌‌ر هه‌موو سیاسه‌‌تی کورد له ‌‌کوردستانی عیراق دانێم و، ئه‌‌و هه‌‌مووه‌‌ گه‌‌نده‌‌ڵکارییه‌‌ له‌‌به‌رچاو نه‌‌گرم به‌ڵکوو زیاتر مه‌‌به‌‌ستم نیشاندانی هه‌‌بوونی هێزی جه‌‌ماوری و، کاریگه‌‌ریی وه‌ها هێزگه‌‌لێکه‌‌. ئه‌‌گه‌‌رنا، گومان له‌‌وه‌‌دا نییه ‌‌که ‌‌ئاره‌‌زووی خه‌‌ڵکی ئاواره‌‌ی که‌‌رکوووک، که‌‌ ئێستاش له‌‌ژێر خێوه‌تدا ده‌‌ژین ، بنه‌‌ماڵه‌‌و که‌‌سوکاری ئه‌‌نفالکراوه‌‌کان که‌ ‌تا ئێستاش له‌ ئیمکاناتی ئاو و کاره‌با و خوێندنگه‌ ‌‌و نه‌‌خۆشخانه‌ ‌بێبه‌‌رین، به‌‌دی نه‌‌هاتووه‌‌، به‌‌ڵکوو دانیشتوانی گه‌‌ڕه‌‌کی فیرعه‌‌ونه‌‌کان، سه‌‌رۆک حیزبه‌‌کان و که‌‌سوکاریانن که ‌‌تام‌وبه‌رامی شیرینی سه‌‌رکه‌‌وتن ده‌‌چێژن. ئاره‌‌زووی هێرشی ئه‌‌مریکا به‌‌تایبه‌‌ت له‌‌هه‌‌لومه‌‌رجێکدا که ‌‌ئوپۆزیسیۆن ئاوا پرشوبڵاوه ‌‌و ته‌‌نانه‌‌ت ناتوانێ چکۆله‌‌ترین ڕۆل و نه‌‌قشی له‌‌سه‌‌ر داهاتووی ئاڵوگۆڕی کۆمه‌‌ڵگای ئێران ‌هه‌‌بێ، نه ‌‌ته‌‌نیا ئاره‌‌زوویه‌کی خه‌‌باتکارانه‌ ‌نییه‌‌، بگره‌‌ خه‌یانه‌‌تکارانه‌‌یه‌.

له‌‌کۆتاییدا با بزانین مه‌‌به‌‌ستی کاک ئه‌‌بووبه‌کر له “‌‌گشتمان” و “هه‌‌ر هه‌‌موومان” کێیه‌؟ سه‌‌ردێڕی نووسراوه‌‌که‌‌ ئه‌‌وه‌‌یه:‌ “گشتمان چاوه‌‌ڕوانین”. له‌‌جێگایه‌‌کی دیکه‌‌ش ده‌‌ڵێ:

“پێکهێنانی به‌‌ره‌‌یه‌‌کی به‌‌رفراوانی دێموکراسیخوازی خۆی به‌‌شێکه‌ ‌له‌‌کاریگه‌‌ریدانان له‌‌سه‌‌ر ئه‌‌و بارودۆخه ‌‌که‌‌هه‌‌‌ر هه‌‌موومان چاوه‌‌ڕوانیی ده‌‌که‌‌ین“.

مه‌‌به‌‌ست له “‌‌گشتمان” و یا “هه‌‌ر هه‌‌موومان” هه‌‌موو خه‌‌ڵکی کوردستانه‌؟ یا خۆ هه‌‌موو حیزبه‌‌کوردییه‌‌کانه‌؟ یا هه‌‌ر دوو کیانه‌؟ که‌‌وابێ کێشه ‌‌له‌‌سه‌‌ر چییه‌؟ ئه‌‌م نووسراوه‌‌ خه‌‌رێکه‌‌ جوابی ‌‌کێ بدا‌‌ته‌‌وه‌؟ به‌‌ڵام وا دیاره‌‌ که‌‌سانێک هه‌‌ن که‌‌ چاوه‌ڕوان نین.

وادیاره‌‌ مه‌‌قسوود ئه‌‌م به‌‌شه‌‌ دابڕاوه ‌‌له‌‌ یه‌‌ک هه‌‌شته‌می کۆمه‌‌ڵه‌‌یه، ‌‌که ‌‌خودی ئه‌و ‌‌هه‌‌شت به‌‌شه ‌‌به‌ ‌ته‌ئکید یه‌‌ک له ‌‌بیستی هه‌‌موو کۆمه‌‌ڵه ‌‌نییه‌. ئه‌‌گه‌‌ر وابێ ئه‌‌مه‌‌ حیزبی کۆمه‌‌ڵه‌‌ی کوردستانه‌‌، که‌‌ به‌‌گشتی و به‌تێکڕای ده‌‌نگ، هه‌‌ر هه‌‌‌موویان، چاوه‌‌ڕوانن و، ئاواته‌‌خوازی هێرشی ئه‌‌مریکان. دوایین کۆنگره‌‌شیان وادیاره هه‌‌نگاوێک بوو بۆ چاوه‌‌ڕوان کردنی هه‌‌ر هه‌‌‌موویان.

نوڤامبری 2007

Tags: , , , , , , , , ,

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s


%d bloggers like this: