یەڵدا بە دوو گوللە کوژرا

“مریەم سادقی”، ناسراو بە یەڵدا، بە دوو گوللە کوژرا! هەواڵەکە ئەوەندە بوو! لە لایەن مێردەکەیەوە! کۆمەڵە وتی نا، هەڵەیە! گوللە کەمانەی کردووە و چالاکانی مەدەنی دەنگیان هەڵبڕی و وتیان نا بۆ پاساوهێنانەوە بۆ مەسڵەحەتی سیاسی! هەموو ڕووداوەکانی سەبارەت بەم کارەساتە لێرەدا بخوێنەوە

Advertisements

تاگەکان: , , , , , , , , ,

13 Responses to “یەڵدا بە دوو گوللە کوژرا”

  1. : ڕۆژپڕێس / Rojpress Says:

    ژنێک له‌ ئۆردوگای کۆمه‌ڵه‌ به‌ ده‌ستی مێرده‌که‌ی کوژرا
    سێ‌شه‌ممه، 21 سه‌رماوه‌ز 1390

    http://nnsroj.com/NNS-ROJ-KU/News/Body.aspx?NewsID=1388
    NNS ROJ: ئه‌مڕۆ دووشه‌ممه‌ (12.12.2011) ژنێک له‌ ئۆردۆگای کۆمه‌ڵه‌ی شۆڕشگێڕی زه‌حمه‌تکێشانی کوردستانی ئێران به‌ ده‌ستی مێرده‌که‌ی کوژرا.

    به‌گوێره‌ی زانیارییه‌کانی (NNS ROJ)، له‌ ئوردۆگای “بازیان”ی نزیک به‌ شاری سلێمانی، ژنێک به‌ ناوی یه‌ڵدا. س ته‌مه‌ن 28 ساڵ، به‌ ده‌ستی مێرده‌که‌ی ش. ر خه‌ڵکی دیوانده‌ره‌ کوژراوه‌. “یه‌ڵدا”، یه‌کێک له‌ پێشمه‌رگه‌کانی کۆمه‌ڵه‌ی زه‌حمه‌تکێشانی کوردستانی ئێران بوو که‌ ماوه‌یه‌ک له‌مه‌وپێش له‌ گه‌ڵ گرووپێکی دیکه‌ به‌هۆی ناکۆکی نێوخۆیی له‌ کۆمه‌ڵه‌ی زه‌حمه‌تکێشانی کوردستان دابڕابوون.

    تا ئێستا روون نه‌بۆته‌وه‌ ئه‌و ژنه‌ پێشمه‌رگه‌یه‌ی کۆمه‌ڵه‌ له‌ سه‌ر چی کوژراوه‌، به‌ڵام به‌ گوێره‌ی ئه‌و زانیارییانه‌ی به‌ ده‌ست گه‌یشتوون به‌ دوو گولـله‌ کوژراوه‌.

    شایانی باسه‌ له‌ یه‌ک دوو ساڵی رابردوودا، چه‌ندین رووداوی هاوشێوه‌ له‌ ئۆردوگاکانی کۆمه‌ڵه‌ی زه‌حمه‌تکێشانی کوردستان و کۆمه‌ڵه‌ی شۆڕشگێڕی زه‌حمه‌تکێشانی کوردستانی ئێران روویان داوه‌.

  2. : ڕۆژپڕێس / Rojpress Says:

    دلشاد جەمشیدی(ئارۆ)

    http://nnsroj.com/NNS-ROJ-KU/News/Body.aspx?NewsID=1399

    گەر بریار بێ
    بۆ هەر ژیانێکی دزارو
    لە پەیکەری ئافرەتی کورد
    سەری پیاوێکمان نەوی بێ
    سەری هەرچی پیاوی کوردە
    لەم قەتلگای مێ‌ینەدا
    وەک تاوانبار ئەبێ شۆر بێ
    گەر بریار بێ
    بۆ کۆژرانی هەر ئافرەتێ
    تاقە یەک دار
    تازیەبار بێ
    هەرچی داری کوردستانە
    وەک بەختی رەشی ژنی کورد
    ئەبێ رەشی لەبەردا بێ
    گەر بریار بێ
    بۆ هەر غەدرێک لە جنسی ژن
    تاقە بەیتێ
    بەلێ تەنیا تاقە یەک بەیت
    ببێت بە ژان‌
    من دلنیام چی شێعر هەیە
    لەم ولاتە ژن‌کوژەدا
    دەنگی دەگاتە ئاسمان

  3. : ڕۆژپڕێس / Rojpress Says:

    مه‌رگی یه‌ڵدا عه‌باسی له‌ نێوان لێدوانی کۆمه‌ڵه‌ و سه‌رچاوه‌کانی پۆلیس دا
    چوارشه‌ممه، 22 سه‌رماوه‌ز 1390
    http://nnsroj.com/NNS-ROJ-KU/News/Body.aspx?NewsID=1400

    NNS ROJ: پاش بڵاوبوونه‌وه‌ی هه‌واڵی کوژرانی ژنه‌ پێشمه‌رگه‌یه‌کی کۆمه‌ڵه‌ به‌ ده‌ستی مێرده‌که‌ی، کۆمه‌ڵه‌ی شۆڕشگێڕ رایگه‌یاند رووداوه‌که‌ نه‌خوازراو بوه‌ و کاردانه‌وه‌کانی‌ به‌رامبه‌ر مه‌رگی ئه‌و ژنه‌ پێشمه‌رگه‌یه‌ی به‌ دوژمنکارانه‌ وه‌سف کرد.

    سكرتارییه‌تی كۆمه‌ڵەی شۆڕشگیری زەحمەتکێشان کوردستانی ئێران رۆژی سێ شه‌ممه‌ (13.12.2011) به‌ ده‌رکردنی به‌یاننامه‌یه‌ک رایگه‌یاند ” هاوڕێ “مریه‌م سادقی” ناسراو به‌ یه‌ڵدا له‌ روداوێكی نه‌خوازراو دڵته‌زین دا گیانی له‌ ده‌ستداو دڵی پڕ له‌ هیوای له‌ لێدان كه‌وت.”

    له‌ به‌یاننامه‌که‌ی کۆمه‌ڵه‌دا ئاماژه‌ به‌وه‌ کراوه‌ که‌ دوای مه‌رگی ئه‌و ژنه‌ پێشمه‌رگه‌یه‌، نه‌یارانیان له‌ سه‌ر تۆڕی ئه‌نته‌رنێت و فه‌یس بووک ده‌ستیان به‌ “ته‌بلیغاتێکی دوژمنکارانه‌” به‌ دژی کۆمه‌ڵه‌ کردوه‌ و پێشمه‌رگه‌ی کۆمه‌ڵه‌یان به‌ ژن کوشتن تاوانبار کردوه‌.

    له‌ کۆتایی به‌یاننامه‌که‌دا بێ ئه‌وه‌ی ئاماژه‌ به‌ ده‌رئه‌نجامی لێکۆڵینه‌وه‌کانی ناوه‌ندێکی پۆلیسی حکومه‌تی هه‌رێم یان سه‌رچاوه‌یه‌کی پزیشکی یاسایی بکرێ، راگه‌یه‌نراوه‌ که‌ “لێکۆڵینه‌وه‌کان ئه‌م راستیه‌ی سه‌لماندوه‌و ئیدیعای نه‌یارانی كۆمه‌ڵه‌ به‌ درۆ ده‌خاته‌وە.”

    له‌ به‌رامبه‌ر ئه‌م لێدوانه‌ی سکرتارییه‌تی کۆمه‌ڵه‌دا،‌ نەقیب جەزا حەمە ئەمین ئەفسەری بنكەی پۆلیسی “بەردە قارەمان” وێڕای پشتڕاستكردنەوەی هەواڵەكە بۆ “وارڤین”ی ئاشكرا كردوه‌ كە كاتژمێر (11)ی شەوی 11 له‌ سه‌ر 12ی دیسێمبەر ئاگاداریان كردوونەتەوە كە رووداوێكی كوشتن لە سنوورەكەیاندا هەبووەو ئەوانیش مەفرەزەیەكیان رەوانەی شوێنی رووداوەكە كردووە.

    نەقیب جەزا ده‌ڵێ: “مەفرەزەكەمان بەخێرایی چوونە شوێنی رووداوەكەو تەرمی مریەم حەمید سادقی لەدایكبووی 1984ی شاری سنەی رۆژهەڵاتی كوردستانیان دۆزییەوە كە دوو فیشەكی بەركەوتبوو. هەروەها لە شوێنی رووداوەكە تۆمەتباری سەرەكی خ.م.م لەدایكبووی 1986 دیواندەرە دەستگیر كراوە و دەستیش بەسەر ئەو چەكەدا گیراوە كە تاوانی پێ كردووە”.

    ئەو ئەفسەرەی پۆلیس ئاشكرایشی كرد كە شەوی پێش رووداوەكە مریەم پەیوەندی كردووە بە خێزانەكەیان لە سنەو پێی ڕاگەیاندوون كە هاوسەرەكەی بە خراپی مامەڵەی له‌ گه‌ڵدا دەكات و ئەوانیش بڕیاریانداوە بێنە هەرێمی كوردستان و كێشەكەیان چارەسەر بكەن. بەڵام كاتێك كە هاتوون تەرمی كچەیان بینیوە.

    پۆلیس هەروەها رایگەیاند كە بەپێی زانیارییەكانی ئەوان، هۆكاری ئەو كوشتنە كێشەیەكی خێزانی بووە.

    بەپێی زانیارییەكانی نەقیب جەزا، پەڕاوی لێكۆڵینەوە لە تۆمەتبار رەوانەی بەردەم دادگا كراوەو بە مادەی 406 لە یاسای سزادانی عێراقی دەستبەسەرە.

    مریەم سادقی ناسراو بە “یەلدا”، یەكێك لە پێشمەرگەكانی كۆمەڵەی زەحمەتكێشانی كوردستانی ئێران بوو كە ماوەیەك لەمەوپێش لە گەڵ گرووپێكی دیكە بەهۆی ناكۆكی نێوخۆیی لە كۆمەڵەی زەحمەتكێشانی كوردستان دابڕابوون.

    یه‌ڵدا سادقی ساڵی ١٣٨٨ی هه‌تاوی به‌ریزه‌كانی كۆمه‌ڵه‌ په‌یویست بووه‌.

  4. : ڕۆژپڕێس / Rojpress Says:

    بەڵگەی سکرتاریەتی کۆمەڵە: سەرچاوەیەک کە نەیویست ناوی خۆی ئاشکرا بکا پێنج‌شه‌ممه، 23 سه‌رماوه‌ز 1390
    http://nnsroj.com/NNS-ROJ-KU/Articles/Body.aspx?NewsID=1406
    ناسری حیسامی

    دوای مەرگی یەلدا، سکرتاریەتی کۆمەڵەی شۆڕشگێڕی زەحمەتکێشانی کوردستانی ئێران ڕای گەیاند ”ئێمه‌ هه‌موو كه‌س دڵنیا ده‌كه‌ین ئه‌م ڕووداوه‌ نه‌خوازراو بووه ‌و لێكۆلێنه‌وه‌ی پۆلیس و پزیشكی یاسایی ئه‌م ڕاستییه‌ی سه‌لماندوه‌ و ئیدیعای نه‌یارانی كۆمه‌ڵه‌ به‌ درۆ ده‌خاته‌وە”.

    ڕاگەیاندنەکەی سکرتاریەت، تەنیا باسی لێکۆڵینەوەی پۆلیس و پزیشکی یاسایی دەکا و، هیچ بەڵگە و زانیارییەکی زیاتر ئاشکرا ناکا. بەڵام ماڵپەڕێکی نزیک لە حیزبەکە، بە ناوی ماڵپەڕی ڕۆژنامە لەم بابەتەوە، قسەی ”بەرپرسێکی ئاسایش“ دەکاتە بەڵگە کە ”نەیویست ناوی ئاشکرا بکرێ“.

    ماڵپەڕی ڕۆژنامە نووسیویەتی: ”بە‌رپرسێكی ئاسایشی ناحیه‌ی به‌رده‌ قاره‌مان كه‌ نه‌یویست ناوی ئاشكرا بكرێ به‌ په‌یامنێری ڕۆژنامه‌ی وت” كه‌ ئه‌نجامه‌ سه‌رتاییه‌كان وا ده‌ری ده‌خات كه‌ گیان له‌ ده‌سدانی ئه‌و كچه‌ پێشمه‌رگه‌ی كۆمه‌ڵه‌ ڕووداوبووه‌ و له‌ كاتی كه‌مانه‌كردنی فیشه‌كدا گیانی له‌ ده‌س داوە“.

    ماڵپەڕی ڕۆژنامە لە هەمان ڕاپۆتدا لە زمان ”به‌رپرسێكی كۆمه‌ڵه‌ كه‌ ئاگادارە و ده‌سبه‌جێ چووه‌ته‌ شوێنی ڕووداوه‌كه‌“ ڕادەگەیەنێ ڕووداوەکە لە کاتی خاوێنکردنەوەی چەکدا بووە. ماڵپەڕی ڕۆژنامە ناوی ئەو بەرپرسەی کۆمەڵەش ئاشکرا ناکا. ڕاپۆرتەکەی ماڵپەڕی ڕۆژنامە دەڵێ: ”ئه‌و بەرپرسەی كۆمه‌ڵه‌ وتی كه‌ هه‌ر ئه‌و شه‌وه‌ لێژنه‌ی لێكۆڵێنه‌وه‌ هاتووەتە‌ شوێنی ڕووداوه‌كه‌ و بۆیان ده‌ركه‌وتووه‌ كه‌ له‌ كاتی پاككردنه‌وه‌ی چه‌كدا فیشه‌ك له‌ ده‌س مێرده‌كەی یه‌لدا ده‌رچووه‌ و له‌ كاتی كه‌مانه‌كردنی فیشه‌كدا یه‌لدا گیانی له‌ ده‌س داوە“.

    بەڵام سەرچاوەیەکی دیکەی پۆلیس کە ناوی خۆی ئاشکرا کردووە، شتێکی دیکە دەڵێ. دوێنێ ڕۆنامەکان و ماڵپەڕەکانی ئینترێت قسەی نەقیب جەزا حەمەئەمین ئەفسەری بنکەی پۆلیسی بەردەقارەمانیان بڵاو کردەوە کە بۆ ”وارڤین“ دواوە.

    ”لەوبارەیەوە نەقیب جەزا حەمەئەمین ئەفسەری بنكەی پۆلیسی بەردە قارەمان وێڕای پشتڕاستكردنەوەی هەواڵی کوژرانی یەلدا بۆ “وارڤین”ی ئاشكرا كرد كە كاتژمێر11.ی شەوی 11-12ی دیسێمبەر ئاگاداریان كردوونەتەوە كە رووداوێكی كوشتن لە سنوورەكەیاندا هەبووەو ئەوانیش مەفرەزەیەكیان ڕەوانەی شوێنی ڕووداوەكە كردووە.

    نەقیب جەزا گوتی: “مەفرەزەكەمان بەخێرایی چوونە شوێنی رووداوەكەو تەرمی مریەم حەمید سادقی لەدایكبووی 1984ی شاری سنەی رۆژهەڵاتی كوردستانیان دۆزییەوە كە دوو فیشەكی بەركەوتبوو. هەروەها لە شوێنی رووداوەكە تۆمەتباری سەرەكی خ.م.م لەدایكبووی 1986 دیواندەرە دەستگیر كراوە هەروەها دەستیش بەسەر ئەو چەكەدا گیراوە كە تاوانی پێ كردووە”.

    ئەو ئەفسەرەی پۆلیس ئاشكرایشی كرد كە شەوی پێش رووداوەكە مریەم پەیوەندی كردووە بە خێزانەكەیان لە سنەو پێیڕاگەیاندوون كە هاوسەرەكەی لەگەڵی بە خراپی مامەڵە دەكات و ئەوانیش بڕیاریانداوە بێنە هەرێمی كوردستان و كێشەكەیان چارەسەر بكەن. بەڵام كاتێك كە هاتوون تەرمی كچەیان بینیوە.

    پۆلیس هەروەها رایگەیاند كە بەپێی زانیارییەكانی ئەوان هۆكاری ئەو كوشتنە كێشەیەكی خێزانی بووە“.

    بە پێی زانیارییەکانی ئەو ئەفسەرە:
    ١- کوژراوەکە دوو فیشەکی بەرکەوتووە.

    ٢- مریەم پەیوەندی كردووە بە خێزانەكەیان لە سنە و پێیڕاگەیاندوون كە هاوسەرەكەی لەگەڵی بە خراپی مامەڵە دەكات و ئەوانیش بڕیاریانداوە بێنە هەرێمی كوردستان و كێشەكەیان چارەسەر بكەن. بەڵام كاتێك كە هاتوون تەرمی كچەیان بینیوە.

    ٣- بەپێی زانیارییەكانی ئەوان هۆكاری ئەو كوشتنە كێشەیەكی خێزانی بووە.

    بەم جۆرە دەبینین سەرچاوەیەک کە ناوی خۆی ئاشکرا کردووە، قسەکانی جیاوازییان هەیە لەگەڵ سەرچاوەکەی دیکە کە ”نەیویست ناوی خۆی ئاشکرا بکا“ و ڕاگەیاندنەکەی سکرتاریەتی کۆمەڵە قسەکانی ئەوی کردووەتە بەڵگەی دڵنیاکردنی هەمووان. هەر بۆیەش، ڕاگەیاندنەکەی سکرتاریەت جگە لە لایەنگرانی حیزبەکە، کەسی دیکەی دڵنیا نەکرد. لە ڕاستیدا ئەو قسەیەی کە ڕاگەیاندنەکەی سکرتاریەت پێی دەڵێ ”تەبلیغاتی دوژمنکارانەی نەیارانی کۆمەڵە“ زیاتر نییە لەوەی نەقیب جەزا حەمەئەمین داویەتی بە ڕۆژنامەکە.

    ڕاگەیاندنەکەی سکرتاریەت زیاتر لەوەی پەژارە بۆ ڕووداوەکە و لایەنگری لە خوێنی یەلدا و ئیرادە بۆ دەرخستنی حەقیقەت نیشان بدا، پاکانەکردن و هەوڵدان بۆ پەردەپۆشکردنی ڕاستییەکانی تێدا دەبینرێ. بە پێی عورفی دادگاکان شاهیدیی بە درۆ و هەوڵدان بۆ گۆڕینی راستییەکان لە بەردەم دادگا، تاوانە. بەڕێوەبەرانی حیزبەکە لە جیاتی ئەوەی ئەنجامەکانی لێکۆڵینەوەی پۆلیس و پزیشکی یاسایی وەک خۆی ڕابگەیەنن و کێشەکە بە دادگا بسپێرن، کەوتوونەتە پاکانە و هەڕەشە. بەمجۆرە، لە جیاتی ئەوەی لە قەتڵێکدا لایەنی دەرکەوتنی حەقیقەت بگرن، سەرجەمی حیزبەکەیان بردووەتە سەر کورسیی شاهیدیی بۆ ئەوە کە یەلدا بە عەمد نەکوژراوە. ئەوە دەتوانێ ڕیسواییەکە لە داوێنی هەموو حیزبەکە بهاڵێنێ. هیچ گومانی تێدا نییە ئەو ڕاگەیاندنە کە شانی سەرجەمی حیزبەکەی بردووەتە بەر ئەو تاوانە، زیاتر لە ڕەخنەی کەسانێک کە داوای لێکۆڵینەوە دەکەن، بە زیانی حیزبەکەیە. ئەوە زۆر زیاتر لە قسەی هەموو ”نەیارانی کۆمەڵە“ زیانی بە ناوبانگی حیزبەکە گەیاند.

    لەم ڕووداوە دا و لەهەر ڕووداوێکی دیکەی لەم چەشنەدا یەک ڕێگا بەرەو دەرکەوتنی حەقیقەت هەیە: کێشەکە بسپێردرێ بە دادگایەکی خاوەن سەڵاحییەت و، ڕێگا بدرێ دادگاکە بە دوور لە دەستێوەردانی مەسڵەحەتخوازانە کاری خۆی بکا.
    ١٤/١٢/٢٠١١

  5. : ڕۆژپڕێس / Rojpress Says:

    سه‌رت داخه‌ ده‌نا براچکۆله‌که‌م قه‌ت لێت نابوورێ!
    شه‌ممه، 25 سه‌رماوه‌ز 1390

    (ئه‌وه‌ی سه‌رچاوه‌که‌ی ئێمه‌ ده‌خاته‌ ژێر پرسیاره‌وه‌ دوژمنکاره‌ و ناخۆمانه‌. ناخۆمانه‌ واته‌ ئه‌وه‌ی که‌ دموچاوی سه‌یرو سه‌مه‌ره‌ی هه‌یه‌، شاخی هه‌یه‌ و کلکی درێژه‌… ئه‌وه‌ی ده‌هۆڵه‌که‌ی باش بۆ ئێمه‌ لێده‌دا خۆمانه‌یه‌ واته‌ جوانه‌ و راستگۆییه‌که‌ی به‌ ئێمه‌ ده‌سه‌لمێنێ.)

    زۆر دوور نه‌ڕۆین، با چه‌ند لاپه‌ڕه‌یه‌کی دنیای ئاژه‌ڵان هه‌ڵبده‌ینه‌وه‌. به‌ڵێ ئێره‌ جه‌نگه‌ڵه‌! ئه‌و پێگه‌یه‌ی که‌ غه‌ریزه‌ فه‌رمان ده‌دا. ‌لێره‌ ته‌نیا هێزه که‌ بۆ”مانه‌وه”‌ ده‌ور ده‌بینێ. راده‌ی خواردن، کردن، تێربوون، ئاستی هێز ده‌رده‌خا. ئه‌وه‌ی لێی نزیک بێته‌وه‌ ناخۆمانه‌یه‌، دوژمنه‌ و ده‌درێته‌ به‌ر په‌لامار.

    ئه‌مانه‌ نمونه‌یه‌کی زۆر چکۆله‌‌ن که‌ له‌نێو ئه‌فسانه‌ و حیکایه‌ته‌کاندا هاتوون و باسی کولتورێکی دیکه‌ ده‌کا که‌ جیایه‌ له‌وه‌ی خۆی، واته‌ پێیوایه‌ نامۆیه‌ و به‌ نامۆی ده‌بینێ، یانی کولتووری خۆمانه‌ نا! ئه‌ویتری ناخۆمانه‌. “لیونبێرگ” سه‌باره‌ت به‌ رووبه‌رووبونه‌وه‌ له‌گه‌ڵ ناخۆمانه‌ ده‌نووسێ: کێتسیاسی یۆنانی له‌ سالی 500ی به‌رله‌ زایین ناوی به‌شێک له‌ دێوه‌زمه‌کانی ریز کرد، باسی ئه‌و مرۆڤانه‌ بوو که‌ دموچاویان گۆڕاوه‌ و بوونه‌ته‌ دێوزمه‌ و کاری سه‌یروسه‌مه‌ره‌ ده‌که‌ن. واته‌ باسی ئه‌و که‌شوهه‌وایه‌ی که‌ له‌ده‌ره‌وه‌ی یۆنان زاڵ بووه‌ و گه‌مارۆی داوه‌.

    دێو و درنج، هه‌ژدیها و دوژمنه‌ سه‌یروسه‌مه‌ره‌کان، شتی سه‌رسووڕهێنه‌ر ده‌خۆن بۆ تێربوون، جلوبه‌رگی سه‌یر و سه‌مه‌ره‌تر له‌به‌ر ده‌که‌ن. شاخیان هه‌یه‌ و یه‌کیان له‌ مه‌غریبه‌ و ئه‌ویدیکه‌یان له‌ مه‌شریق!
    ئه‌وه‌ی لێره‌دا گرینگه‌ ئه‌و سنووره‌یه‌ که‌ له‌ نێوان که‌شوهه‌وای خۆمانه‌ و ئه‌و که‌شوهه‌وایه‌ی که‌ به‌جۆرێک له‌ جۆراکان ناخۆمانه‌یه‌ یان خۆی هه‌ڵاویشتووه‌ و بۆته‌ ناخۆمانه‌…. ئه‌مه‌ له‌ راستیدا کارکردی ئیدیۆلۆژیکیی هه‌موو کولتوور یان گروپ یان ده‌سته‌ و تاقمێکه‌ که‌ خۆی به‌ ره‌سه‌ن، ئه‌سڵ، پاک داده‌نێ و ئه‌ویدیکه‌، به‌ ناره‌سه‌ن، نائه‌سڵ، ناپاک ده‌زانێ. خۆمانه یانی ئه‌وه‌که‌ تۆ هه‌موو کرداره‌کانی من په‌سند بکه‌ی، ملکه‌چی بی و بۆی له‌گه‌ردن بده‌ی!

    هاتنه‌ئارای بابه‌تی خۆمانه‌ و ناخۆمانه‌ (بێگانه‌) له‌ کۆمه‌ڵگا و له‌ ئاستێکی بچوکتردا له‌ نێو حیزب، گروپ، ده‌سته‌ و بانده‌ جۆراوجۆره‌کاندا راده‌ی گه‌یشتن به‌ شارستانییه‌ت یان مه‌ده‌نی بوون، یان راده‌ی دیموکراتیک بوون یان گه‌یشتن به‌ جه‌وهه‌ری دیموکراتیکی نیشان ده‌دات. له‌وشوێنانه‌ی که‌ نادیموکراتیکن ره‌وتی به‌خۆمانه‌کردن و ناخۆمانه‌کردن یه‌جگار توندو تۆڵه‌. به‌ڵام هه‌رچی چرکه‌کانی کاتژمێری مێژوو به‌ره‌و دیموکراتیکبوون و ئازادیی هه‌ڵبسووڕێت له‌ خیرایی ئه‌م ره‌وته‌ به‌ره‌وپاشه‌ که‌م ده‌کاته‌وه‌.
    ئه‌گه‌ر کۆمه‌ڵگا یان هه‌ر گروپێک له‌ بچووکترین ده‌روویه‌کی که‌‌ پێی شکبێ به‌که‌یفی خۆی که‌ڵک وه‌ربگرێ و ده‌ستی لێبه‌رنه‌دا، کۆیه‌که‌ که‌ هێشتا یاسای غه‌ریزه‌ به‌سه‌ریدا حوکم ده‌کا و جه‌ماوه‌ره‌که‌ی به‌ ناچاریی به‌ دوو به‌شی خۆمانه‌ و ناخۆمانه‌ دابه‌ش ده‌کا. (له‌ پێگه‌یه‌کی گه‌وره‌دا وه‌ک حکومه‌تی ئیسلامی ئێران، سوریه‌ و لیبی و…)

    به‌کورتی بۆدواجار وه‌بیرت دێنمه‌وه‌، ملکه‌چبه‌ له‌به‌رامبه‌ر ده‌نگی زۆرینه‌ که‌ له‌ڕێگه‌ی ئازاد و سانسۆڕنه‌کراو و بێ فرتوفێڵ کۆبۆته‌وه‌.. ده‌ست له‌م خۆشه‌ویسته‌ت (کورسیی ده‌سه‌ڵات) به‌ربده‌ بیسپێره‌ به‌ده‌ستی ئه‌وه‌ی که‌ تۆ پێتوایه‌ ناخۆمانه‌یه‌ و زۆرینه‌ی ده‌نگی ئازادی پێدراوه‌، ئه‌مه‌ ته‌نیا رێگه‌ی مانه‌وه‌یه‌کی ئه‌رێنییه‌. من بۆدواجار پێتی ده‌ڵێم‌ تۆ له‌منی، جارێکی دیکه‌ با دووباره‌ نه‌بێته‌وه‌ و سه‌رت داخه‌ له‌ئاست یه‌ڵدا زیندووه‌کان، ده‌نا‌ براچکۆله‌که‌م قه‌ت لێت نابوورێ!!

    http://nnsroj.com/NNS-ROJ-KU/Articles/Body.aspx?NewsID=1419

  6. : ڕۆژپڕێس / Rojpress Says:

    چالاکانی کورد: با پرسی ژن نەبێتە قوربانی مەسڵەحەتی سیاسی
    شه‌ممه، 25 سه‌رماوه‌ز 1390

    http://nnsroj.com/NNS-ROJ-KU/News/Body.aspx?NewsID=1420
    NNS ROJ: کۆمەڵێک لە چالاکانی مەدەنی، مافی مرۆڤ و ڕۆژنامەوانانی کورد، لە بەیاننامەیەک دا، وێڕای سەرەخۆشی لە بنەماڵەی “مریەم سادقی” ناسراو بە یەڵدا، کوشتنی ژنان بە هەر بیانوویەک بە توندی ئیدانە دەکەن و داوا لە کۆمەڵەش دەکەن کە هۆکار و چۆنیەتی کوژرانی یەڵدا ئاشکرا بکات.

    چالاکانی کورد لە بەیاننامەکەیان دا باس لە گیرۆدەبوونی کوردستان بە دیاردەی دژە مرۆڤایەتی و ناشارستانی “کوشتنی ژیان بە بیانووی نامووس” و “نەریتی پیاوسالاری کۆمەڵگا” دەکەن و وێڕای مەحکوومکردنی کارەساتەکە، داواکارن کە ئەم بابەتە نەبێتە قوربانی بەرژەوەندی سیاسی.

    لە بەیاننامەکە دا هەروەها داوا لە “کۆمەڵەی زەحمەتکێشانی کوردستانی ئێران”یش کراوە کە لە جێگەی پاساوهێنانەوە و هەروەها بۆ ئەوەی ڕووداوی لەو چەشنە، جارێکی تر دووپات نەبێتەوە، ئەوپەڕی هەوڵی خۆی بۆ ڕوونکردنەوەی گۆشە تاریکەکانی کارەساتەکە بدات.

    دەقی بەیاننامەکە ئەمەیە:

    بەیاننامەی کۆمەڵێک لە چالاکانی بزوتنەوەی ژنان، چالاکانی مەدەنی، سیاسی و رۆژنامەنوسان سەبارەت بە کوژرانی “مریەم سادقی”

    هەواڵێکی کورت بوو؛ ژنیک بە دەستی مێردەکەی کوژرا. هەمو سرنجەکان بۆ لای کوشتنی ناموسی هەڵسوڕانەوە. رووداوەکە لە شار یا دێهاتێکی کوردستاندا نەقەومابوو، رەنگە ئەگەر بەوجۆرە با وەکوو زۆر رووداوی دیکەی لەم چەشنە لە ژێر سێڵاوی رووداوەکانی دیکەدا بزر دەبوو. بەداخەوە ئەمجارە لە نیو ئۆردوگای ” کۆمەڵەی شۆڕشگێڕی زەحمەتکێشانی کوردستانی ئێران” لە کاتێکدا زۆربەی هەواڵەکان باس لە بەئەنقەست بونی روداوەکە دەکەن، ژنێک بە ناوی “مریەم سادقی” ناسراو بە یەڵدا بە دەست مێردەکەی خۆی کوژرا.

    هاواریک لە چەشنی ئەو هاوارە کپکراوانەی کە ساڵەهایە پەنگی خواردۆتەوەو “کوردستان” دەیبیسێت وەک “میدیا” لە نامەکانی “فەرزاد کەمانگەر” دا، ” فرێشتە”ی مەریوان و “دوعا” و هەزارانی دیکە لە هاواری یەلداشدا دەنگی دایەوە.

    بە پێی ئامارەکان ساڵانە زیاتر لە پێنج هەزار کەس دەبن بە قوربانی کوشتنە نامووسییەکان، کە لەو ژمارەیە رێژەیەکی بەرچاو لە رۆژهەڵاتی ناویندا رودەدات و سەد مەخابن کوردستانیش یەک لەو هەریمانەیە کە گیرۆدەی وەها دیاردەیەکی دژە مرۆڤانەو ناشارستانییە.

    “یەلدا” یەکەم ژنی کورد نییە کە دەبێتە قوربانی کۆمەڵگە و نەریتی پیاوسالاری و بێ گومان دوایین قوربانیش نابێ. بەڵام چاوەروانی ئەوە بوو کە “کۆمەڵەی شۆڕشگێڕی زەحمەتکێشانی کوردستانی ئێران” و لە سەرەوەی هەمویان “سکرتاریەتی” ئەو حیزبە، کە لانیکەم لە درۆشمدا پرسی “بەرگری لە ماڤی ژن”یان بەرجەستە کردۆتەوە، بە لە بەرچاوگرتنی ئەو شەپۆلە نیگەرانییەی کە ئەو رووداوە لە نێو رای گشتی و چالاکاندا هێنایە ئاراوە، زیاتر دەرکیان بە هەستیاریی مژارەکە کردباو بە جێگای پاساودانی کارەساتێکی ئاوا بە رونی وەڵامدەر بان.

    چاوەروانی هەموو لایەک ئەوە بوو کە ئەوان لە راگەیاندراوە بەپەلەکەی خۆیاندا، لای هەمووان ئەو گومانە ساز نەکەن کە پرسی ژنان و ماڤی ژیانی ئەوان خەریکە بە جۆرێک لە جۆرەکان دەبێت بە قوربانیی بەرژەوەندی و مەسڵەحەتی سیاسی.

    هاوپێوەند دەگەڵ ئەو کارەساتە هیندێک بەلارێدابردنیش هاتونەتە ئاراوە کە سەبارەت بە دەقی روداو بێ هەڵوێستن بەڵام خەریکی چەواشەکردنی ئەو بابەتەن. یەکیک ئەو کارەساتە بۆ “پاشکەوتوویی فەرهەنگی” دەگەرێنێتەوەو ئەویدی بە مەبەستی قازانجی تاکە کەسی خۆی و گروپی تایبەت کەڵکی لێوەردەگرێ. ئیمە ئەم جۆرە هەڵسوکەوتانە بە دوور لە ئەخلاقی سیاسی دەزانین، بەڵام هاوکات لە سەر ئەو باوەڕەین کە بە دوژمن زانین و بە دوژمن ناساندنی کۆی رەخنەگران ئەو جۆرە کە لە راگەیاندراوی “کۆمەڵەی شۆڕشگێڕی زەحمەتکێشانی کوردستانی ئێران” دا بە ئاشکرا باسی لێوە کراوە، ریشەی لە هەمان کولتووری سیاسیدایە کە راشکاوانە لە رەخنە دەترسێت و لە نێو رای گشتیدا وەڵامدەری ناروونییەکان لە پێوەندی دەگەڵ کرداری خۆیدا نییە.

    ئێمە کە واژۆی خۆمان خستۆتە سەر ئەو راگەیەندراوە، وێرای بەرزڕاگرتنی یاد و بیرەوەری “مریەم سادقی” دەگەڵ بنەماڵەی ماتەمباریدا خۆ بە هاوخەم دەزانین و شەریکە خەمی ئەو کۆستەین. بۆ ئەوان سەبووری و بۆ یەلدای جوانەمەرگیش ئارامشێکی ئەبەدی بە ئاوات دەخوازین.

    ئێمە وێرای ئیدانەکردنی کوشتنی ژنان لە ژێر هەر ناوو بیانۆیەک و لە هەر شوێن و هەلومەرجێکدا، نەتەنیا بە شیاوی نازانین کە بە بێدەنگی خۆمان پەسنی وەها کارەساتگەلیک بدەین، بەڵکو دەربڕینی نارەزایەتی بە گونجاوترین شێواز بۆ بەرەنگاربوونەوە دەزانین. بۆیە داواکارین “حیزبی کۆمەڵەی زەحمەتکێشانی کوردستانی ئێران” ، تەنانەت ئەگەر هێشتاش بروامەندە بە “رێکەوت بوونی” ئەم کارەساتە، بە مەبەستی پێشگرتن لە روداوی هاوشێوە لە راپۆرتێکی شیاودا بە هاوکاری دەگەڵ کەسانی ناسراوو سەربەخۆ کە چالاکانی بواری پرسی ژنانیش لە ئامادە کردنیدا بەشدار بن، راشکاوانەو بێ مەرج یاریدەری رەوینەوەی گومانەکان و ئەو پرسیار و دڕدۆنگییە لە رای گشتیدا بێت.

    ئێمە وەک کۆمەڵێک لە چالاکانی مەدەنی رۆژهەڵاتی کوردوستان کە ژمارەیەکمان لە بواری ژنانیشدا چالاک بوین و هەین لە دۆخێکدا کە ئیمکانی چالاکیمان نییە لە باشوری کوردوستان، داواکارین هاوکارەکانمان لە رێکخراوەکانی پارێزەری مافی ژنان و بە تایبەت دەزگا چالاکەکانی شاری سلێمانی، بە هەر شێوەیەکی گونجاو سەبارەت بە پرسی کوژرانی یەڵدا هەڵوێست بگرن و بەدواداچونێکی جیددی لە سەر بکەن. داواکارین کەیسی کوژرانی یەڵدا بەوپەڕی شەفافیەتەوە لە رێگای دەزگای دادەوە بۆ رای گشتی ئاشکرا بکرێت و ئەو رێکخراوانەش یارمەتیدەر بن بۆ رونکردنەوەی

    ئەو چالاکانەی دەیانهەوێ بەیانیەکە ئیمزا بکەن تکایە ناوەکانیان بۆ ئەو ئیمەیلە رەوانە کەن
    yaldasadeqhi@gmail.com

    مه‌رگی یه‌ڵدا عه‌باسی له‌ نێوان لێدوانی کۆمه‌ڵه‌ و سه‌رچاوه‌کانی پۆلیس دا
    بۆ یەلــــداکانی ولاتەکەم/ دلشاد جەمشیدی(ئارۆ)
    ژنێک له‌ ئۆردوگای کۆمه‌ڵه‌ به‌ ده‌ستی مێرده‌که‌ی کوژرا
    عارف سلیمی.1

    کژال نقشبندی.2

    نارین محمدی.3

    عطا جمالی.4

    مهین شکرالله پور.5

    داوود آزادفر.6

    صباح نصری.7

    هادی حق شناس.8

    صبری بهمنی.9

    فرزانه علی.10

    شمزین جهانی.11

    عارف نادری.12

    سارو خلیقی.13

    رویا طلوعی.14

    شلیر باپیری.15

    نیما بازاللهی.16

    سنور یونسی.17

    صلاح عباسی.18

    هومن سعدیه.19

    سحر دیناورد.20

    محبوبە حسینی.21

    مریم فتحی.22

    مسعود فتحی.23

    مسعود مناف.24

    سما شاملو.25

    ملکه علم هولی.26

    فرزانه حوری.27

    پریسا شیرزاد.28

    اسمر معماری.29

    گلاله سمیعی.30

    هاوژین سمیعی.31

    حبیبه عبداللهی.32

    پریسا تربتی.33

    نگین شیخ الاسلامی.34

    آریز اندریاری.35

    امیر صلواتی.36

    کژال شیخ محمدی.37

    اسرین حسینی .38

    هیوا زکریایی.39

    کویستان جعفری.40

    انور عباسی.41

    میدیا بایزید پور.42

    ابراهیم جهانگیری.43

    ناهید مکری.44

    روژه عزیزی.45

    فرمیسک احمدی.46

    گلارزان شریفی.47

    عبد اله ویسی.48

    کویستان عمر زاده .49

    هلاله سلحشور.50

    راحله اساسی.51

    پیمان سابلاغی.52

    توران زندی.53

    کوستان فتوحی.54

    لیلا احمدی.55

    نجیبە محمود.56

    طیب هوشیار.57

    هژار جوانرویی.58

    جمال نجاری.59

    پویا صادق وزیری.60

    غفور محمدی.61

    شورش حاجی میرزایی.62

    سید یاسر حسینی.63

    افراسیاو گرامی.64

    نرمین بهشتی زاده.65

    فرشید دلیر کمانگر.66

    اذر نیوش.67

    ادم آهی.68

    انور حسن پور.69

    سیاوش امجدی.70

    هادی فیضی.71

    عمار گلی.72

    یحیی خضرنژاد.73

    محمد امینی.74

    درسیم اورامار.75

    ریبوار معروف زاده‌.76

    چیمن حسنی،.77

    رویا کامیل.78

    سکالا حکیم زاده.79

    رویا جمالی.80

    خورشید تابان.81

    رویا حسینی.82

    فريبا محمدي.83

    عدنان هنرور.84

    بهداد بردبار.85

    ابراهیم فکری.86

    هادی محمدی.87

    مینا لبادی.88

    سیاوش گودرزی.89

    ایاز خون سیاوشیان.90

    کاروان بلوری.91

    خالد توکلی.92

    صفا ماملی،.93

    شهلا سنه ،.94

    روناک حسنی.95

    گزیزە باپیری.96

    شیرین جهانی.97

    میدیا آریان.98

    شیرزاد قادری.99

    زینب تربتی. 100

    زاهد هنبلی.101

    شیرکو جهانی اصل.102

    سایت های مهاباد مکریان و بوکان مکریان.103

    کورش قادری.104

    نادر احمدی. 105

    علی قادری.106

    شورش مرادی. 107

    شهاب الدین شیخی. 108

    سامان شجاعی. 109

    گلبهار شریفی.110

    آسو پیروتی. 111

    داوود غفاری. 112

    آرام رشیدی.113

    رضا منوچهری. 114

    عمر عنایتی. 115

    هاوار بازیان.116

    خلیل خاوریان.117

    شوان بورهان.118

    کورش خاوریان.119

    رحمان بیسآران.120

    عامر گولی.121

    امیر لکی.122

    رها صلح جو.123

    .دلشاد جمشیدی124

    اذر طاهرابادی.125

    شبنم قادری.126

    نگار عنایتی.127

    شاهد علوی.128

    نگار رحیمی.129

    نهیه خوشکلام.130

    صلاح بایزیدی.131

    شلیر شبلی.132

    هه یاس کاردو.133

    امیر سلطان پناه.134

    عوسمان نوباری.135

    حسین فتحی.136

    ساموئل کرماشانی.137

    اریز داراپور.138

    جمیله حکیمی.139

    لوقمان بیستونی.140

    میران مهابادی.141

    فریبا بیانیه.142

    نازی پیروز.143

    سرگل قازی.144

    لیلا اصلانی.145

    سودابه سرخیل.146

    فرشته قازی.147

    بریوان کوردی.148

    نازنین ارین.149

    ارزو نیک.150

    مه رزه درویشی.151

    رویا سنه .152

    کلارا اورامی.153

    یوسف علی پور.154

    احمد حسینی.155

    کیوان سنایی.156

    به یان فه رشی.157

    ندا کوردستانی.158

    صه لاح عبالله خدر.159

    نگار حکیمی.160

    ندا زرد ارا.161

    سرگل بیتوشی.162

    سوله یمان چووکه لی.163

    جمیل احمدی.164

    سنتر زنان کرد در شهر کلن /المان.165

    شیلا گیتار.166

    فرح شکوهی.167

    تارا زیبای خفته.168

    روناک حسینی.169

    شهلا سنه.170

    هیوا اسدی.171

    روژین (فرح) شریفی.172

    فه ریبرز فه خاری.173

    بهنام امینی.174

    علی شاکری.175

    یادگار شیخ الا سلامی.176

    ارزو نیچه لانی.177

    که ریم مولودی.178

    دیاکو زندی.179

    مافی بڵاوکردنه‌وه‌ی هه‌واڵ و بابه‌ته‌کان بۆ (NNS ROJ) پارێزراون

  7. : ڕۆژپڕێس / Rojpress Says:

    نامەیەک بۆ کۆمەڵەی شۆڕشگێڕی زەحمەتکێشانی کوردستانی ئێران
    16 Dec 2011
    http://www.sharistan.org/index.php?id=485
    دۆستانی بەڕێز!

    دەمهەوێ راستەوخۆ لە گەڵتان بدوێم و هەر بۆیە لە جیاتی وتارێک، نامەیەک دەنووسم.

    ئەم ڕۆژانە دیمەنێکی ناشیرینتان لە خۆتان و حیزبەکەتان نیشان دا. پێشمەرگەیەکتان کوژراوە. خەڵک بە خەمەوە بوون و لێی دواون. ئێوە لە جیاتی ئەوەی وەک حیزبی یەلدای کوژراو، وەک خانەوادەی یەلدا، هەموو ئەو سۆز و بەدەربەستبوونە کە خەڵک بۆ دەرکەوتنی حەقیقەتی ماجەراکە نیشانیان دا، لە باوەش بگرن و، وەک هاوسۆزی لە گەڵ پێشمەرگەکەتان و خۆتان و حیزبەکەتان وەری بگرن، بە بێ هیچ سەبەبێک کەوتوونەتە هەڵوێستی وەستانەوە بەرانبەر بەو خەڵکە. قسەی ناشیرینیان پیدەڵێن. پێیان دەڵێن ئێوە مرۆڤدۆست نین. پێێان دەڵێن ئێوە درۆزن و ڕیاکارن و فیمینیستی دووڕوون. پێیان دەڵێن ئەدی بۆ لە فڵانە حیزب وەدەنگ نایەن. لەوپەڕی سەرسوڕماندا بە چاوی خۆم دیتم و خوێندمەوە کە نووسیوتانە: بۆچی شیعر بۆ یەلدا دەڵێن؟ نازانم بۆچی شیعر وتن بۆ یەلدا و لاواندنەوەی ژنەپێشمەرگەیەکی جوانەرمەرگ، کە پێشمەرگەی ئێوە بووە تووڕەتان دەکا؟ ئایا پێتان وایە ئەم لاواندنەوەیە پیلانێکی لە دژی ئێوە و حیزبەکەتان لە بندا شاردراوەتەوە؟ دڵنیاتان دەکەم وا نییە. ئێوە بەم کارەتان، تەنیا ناوبانگی خۆتان و حیزبەکەتان لەکەدار کرد.

    ئێوە نازانم بە چ لێکدانەوەیەک، لەم کێشەیەدا، زیاتر لەوەی خۆتان وەک خانەوادەی یەلدا و حیزبی یەلدا بناسێنن و بدوێن، وەک حیزب وخانەوادەی مێردەکەی دەدوێن.

    ئەوانەی لەم ماوەیەدا وەدەنگ هاتوون، بەشی هەرە زۆریان لەو ڕۆشنبیر و چالاکە مەدەنییانەن کە حیزبەکەی ئێوە لە میدیای خۆیدا زیاتر لە حیزبی دیکە بایەخ و قورساییان پێدەدا. ژمارەیەک لەوانە، گەڵێک جار لە میدیای حیزبەکەی ئێوەدا، وەک کەسانی تێکۆشەر و خۆشناوی بواری خەباتی مەدەنی گفتوگۆیان لەگەڵ کراوە و هەواڵی خەبات و تێکۆشانیان بڵاوکراوەتەوە. سیمای وایان تێدایە هەر چەند مانگ لەوەپێش، تاجەگوڵینەی سپاسی خەڵكی شارێکی وەک کرماشانیان خراوەتە مل و ئێوەش بە پێزانینەوە هەواڵەکەیتان بڵاو کردووەتەوە. بە پێی چ لێکدانەوەیەک بە باشتان زانی ئەوانە بە نەیاری خۆتان نیشان بدەن و قسەی سووکیان پێ بڵێن؟

    ئێوە حیزبێکی سیاسین کە دەتانهەوێ لە دەسەڵاتی سیاسیدا بەشدار بن. دەبێ هەوڵ بدەن کە خەڵک متمانەتان پێ بکەن و وەک هێزێکی عەقڵانی، وەڵامدەرەوە، بەدەربەست و ڕێزدانەر بۆ یاسا و گوێڕاگر بۆ دیالۆگ و ڕەخنە، بتانناسن. لە تاران کاتێک ”نەدا“ کوژرا، خەڵک ویستیان بکوژەکەی سزا بدرێ. ئەوانەی دەبوو ئەو سزادانە دەستەبەر بکەن جارێک وتیان نەدا خۆی تەقەی لە خۆی کردووە، جارێک وتیان هاوڕێکانی خۆی کوشتوویانە و جارێک وتیان ئینگلیس کوشتوویەتی. ئێوە لە قەتڵی یەلدا دا، لە جیاتی ئەوەی هەمووان دڵنیا بکەن کە قەتڵەکە عەمدی نەبووە، پێویستە ئەو متمانەیە بدەن کە خۆتان پێش هەموو کەس و بەدەربەستتر لە هەموو کەس وەدووی لێکۆڵینەوە دەکەون و داوای بڕیاری دادگا دەکەن. کەچی بەداخەوە لە ڕاگەیاندنەکەی سکرتاریەتدا ئەوەتان نەکرد و گەلێک جار لە نووسینی ئەندامەکانتاندا دەڵێن جا لە هەموو جێگایەک ڕووداوی وا هەیە، وەک ئەوەی مەبەستتان ئەوە بێ کە دەیجا چ بوو کوژراوە.

    ڕووداوی ئاوا، بەڵێ لە هەموو جێگایەک دەکرێ ڕووبدا، بەڵام لە نێو حیزبێکدا کە بە خەبات لە پێناوی مافی ژناندا ناسراوە، زیاتر لە هەموو جێگایەکی دیکە سەرنج و پەژارە دەبزوێنێ. پەژارەکەش کاتێک زیاتر دەبێ کە خەلک ببینن ئێوە بە پێچەوانەی چاوەڕوانییەکانیان وەدەنگ دێن.

    من ئەڵبەت حیزبەکەش لە پێکهاتنی زەمینەی قەومانی ڕووداوی ئاوا دا بە بێ خەتا نازانم. پێم وایە کێشەی نێوان باڵەکانی کۆمەڵە، زیاتر لە هەموو کاتێکی دیکە، بەشە جۆراوجۆرەکانی ئەو حیزبەی وا لێکرد کە لە حاست کەسانێک کە ڕەفتاری وایان لێ بوەشێتەوە چاوپۆشی بکەن و لە نێو هێزەکانیاندا جێیان بۆ بکەنەوە. ئەوەش تایبەتمەندیی تەنیا ئەو لایەنەی کۆمەلە نییە و دیتوومانە کە لە سەردەمی توندبوونەوەی کێشەکاندا، هەموو جارێ کەسانی ئاوا مەیدانیان بۆ کراوەتەوە. ئەگەر چاوێک لە ئەدەبیاتی حیزبەکەی خۆتان لە پێنج ساڵی ڕابوردوودا بکەن دەبینن کە گەلێک جار باسی ئەو دیاردەیەتان کردووە و ئێستا داوێنی ئێوەشی گرتووەتەوە. ئەوە باسێکە کە لە جێی خۆیدا پێویستە بکرێ.

    ئێستا کە باسەکە هاتووەتە گۆڕ، چاوەڕوانی لێتان ئەوەیە وەک حیزبێکی بەدەربەست و وەڵامدەرەوە بکەونە دیالۆگ لە گەڵ ئەو کەسانەی دەیانهەوێ لە گەڵتان بدوێن. ئەو وەدەنگ هاتنەی ڕووناکبیران و چالاکانی سیاسی و مەدەنی، ئەگەر لە خۆتانی تێک نەدەن دەرفەتێکی گەورەیە بۆ حیزبەکەتان کە دیالۆگیان لە گەڵ بکەن، متمانەیان بەدەست بێنن و نیشان بدەن کە ڕێز دادەنێن بۆ بەشدارییان لە باسێکی وا گرینگدا.

    بۆ ئەوەی بیانکەنە لایەنی دیالۆگ مەرجیان بۆ دامەنێن کە دڵنیاتان بکەن دوژمنتان نین، مرۆڤدۆستی ڕاستەقینەن، فێمێنیستی ڕەسەنن، حەتمەن ڕەخنە لە حیزبی دیکەش دەگرن یان شتی لەو بابەتە.

    منیش خۆم بە نەیارتان نازانم. ئەگەر هیچ نەبێ لەبەر ئەوەی لە مێژە یەکتر دەناسین، لە خۆم ڕادەبینم لە هەر جێگایەک پێویست بوو وەدەنگ بێم.

    ناسری حیسامی
    ٢٠١١/١٢/١٦

  8. : ڕۆژپڕێس / Rojpress Says:

    کوشتنی ژن، سنووری چینایەتی و فکری ناناسێت

    15 Dec 2011
    http://rojhelattimes.org/read.php?id=4589
    قەرەنی قادری

    لێڤ نیکۆڵایێڤیچ تاڵستۆی: هەموو لە فکری ئەوەدان کە مرۆڤ بگۆڕن، بەڵام بەداخەوە هیچ کەس لەفکری ئەوەدانییە کە خۆی بگۆڕیت.

    ژنکوژیی تەنیا پەیوەندی بە کۆمەڵگەی دەرەبەگایەتی، یان پێش دەرەبەگایەتییەوە نییە، ئەم دیاردەیە سنووری چینایەتی و فکریش ناناسێت. لە ڕۆژگاری ئەمڕۆدا، پێویست ناکات بەدوای ڕیشە چینایەتییەکەیدا بگەڕێت و خێرا ئەم دیاردەیە لە کۆمەڵگەی دواکەوتوو گرێ بدەیت و سووک و هاسانیش وەڵامێک وەربگری، وەک ئەوەی کە هەر ئێستا باوە. ڕۆشنبیر و شۆڕشێگێڕە ئاسان و چەند وشەیییەکان ئەوە دەکەن.
    ئەزموون نیشانی داوە و ڕۆژانە دەیسەلمێنێت، کە بە کتێبخوێندەوە (مارکس، لێنین، گرامشی، فۆکۆ، سیمۆن دۆ بووار و …) فێرە شتێکی ئەوتۆ نابن، کتێب دەبێت ئەو ئەژدیهایەی دەروون کە ساڵەهایە لە ناو ناخدا جەستە و مێشک دەهاڕیت، وێرانی بکات. کتێبخوێندنەوە تەنیا بۆ ئەوە نییە کە زانیاری بە ئەوانی تر بفرۆشرێت. کتیب و زانیاری بۆ ئەوەیە، جیهانی دەروون و ئاسۆی بەرتەسکی مێشک فراوان بکات و لە ژیانی ڕۆژانەدا خۆی دەرخات. فرانتس کافکا جوانی بۆچووە کاتێک دەڵێت: “کتێب ده‌بێ بیورێک بێت بۆ تێکشکاندنی ده‌ریای به‌ستووی ده‌روونمانەوە.”
    ئەو کەسەی کە پەیامی بەرابەری و ئینسانیی بۆ ئەوانی تر پێیە، دەبێت لە سەرەتادا خۆی لە ڕەفتار و کرداریدا نوێنەری ڕاستەقینەی پەیامەکەی بێت. کەسێک کە نەتوانێت لەگەڵ ژن و خوشک و منداڵیدا ڕەفتاری ماقووڵ و دوور لە ئازاردانی هەبێت، ئەگەر سەد جاریش پەنا بۆ دینی ئیسلام، کولتوور و مارکسیسم بەرێت، هەر گڕگن و بوودەڵەیە.
    کەم نین ئەوانەی کە لە ژێر دروشمی بڕووخێت، یان نەمان بۆ سیستەمێکی کۆنەپەرست، هەروەها لێدانی لافی پێشکەوتوو، پۆخڵەواتی دەروونیان دەشارنەوە. رەفتاری کۆمەڵایەتیی مرۆڤەکان، پێناسە و سەرتر لە هەموو ئیدئۆلۆژییەکە. تا ڕەفتاری کۆمەڵایەتیی ئینسانەکان نگۆڕدرێت و مرۆڤەکان لە دەروونەوە چارەسەری نەکەن، گشت فکر و دامەزراوەکان دەوری شێرپەنجە دەگێڕن.
    لەبەر ئەوە، شێخ، مەلا، ئاغا، چەپ، کۆمۆنیست و …. دەتوان و توانیویانە ژن و منداڵ ئازار بدەن و لە دڕندەترین شێوەشدا بیان کوژن. کابرایەکی ڕەبەنی نەخوێندەوار، کە سەری لە زمانی عەرەبی دەرناچێت و موسڵمانە، لێت دەبێتە ئەفلاتوونی زەمان و “فێرە ئەقڵ و ئاوەز و ژیان”ت دەکات!؟
    بابایەکی “شۆڕشگێر” کە تەنیا لە ژیانیدا چەند گوند و شارۆچکەی بینیوە و هەر لەوێدا گەورە بوو و گیرۆدەی کولتووری دەیان و سەدان ساڵەیە، ئەمڕۆ کۆمۆنیستە و “هەڵگری پەیامی ڕزگاریدەدەری بەشەرە”، بۆت باس لە “دێتێرمێنیزمی مێژوویی” دەکات و دەڵێی ڕزگاریی تۆ لەسەر دەستی ئەو ناوکی بڕاوە!؟ بەڵام کە شۆڕ دەبییەوە ناو ناخیان، ” آن کار دیگر می کنند؟!” ئۆشۆ لە ڕوانگەیەکی ترەوە سەیری ئاڵوگۆڕی دەروون دەکات و دەبێژێت: “مرۆڤ ئاژه‌ڵێکی سه‌یره‌! له‌ هه‌موو شتێک ده‌کۆڵیته‌وه‌، تا دوندی ئه‌وێرێست ده‌ڕوات، تا جه‌مسه‌ری باکوور و ده‌چێته‌ مانگ، به‌ڵام هه‌رگیز بیر له‌وه‌ ناکاته‌وه‌ که‌ سه‌ردانێکی ده‌روونی خۆی بکات! ئه‌مه‌ گه‌وره‌ترین نه‌خۆشییه‌ که‌ ئینسان گیرۆده‌یه‌تی.”
    تکایە سەردانی دەروونتان بکەن و ئەژدیهای نستووی دەروونتان وەخەبەر بێن. تکایە واز لە ئاڵوگۆڕی کۆمەڵگە بێنن، ئەمەیان بارێکی لە ڕادەبەدەر قورسە و کاری هەموو شانێک نییە!

    کوردستان – ١٣/١٢/٢٠١١

  9. : ڕۆژپڕێس / Rojpress Says:

    یەڵداکان نائۆمێدن، شۆرشگێری نائۆمێد لەژیان بێزارە
    http://rojhelattimes.org/read.php?id=4588

    15 Dec 2011

    ژیوار رەسوڵی
    یەڵداکان نەهاتبوون شەری موهتەدی و هیجری و بارام و ئیلخانی زادەو عەزیزی بکەن، ئەوان ئاواتیان بوو وێنەکەیان جارێک لەگەڵ ئەوانە هەبێت و شانازی پێوەبکەن، و لەسەر سینگی دابنێن و لەبەرەکانی بەرگریدا هەرجارەو چاوێک لەوێنەی خۆیان و سەرکردەیان بکەن و ورە بگرن، یەڵدا نەهاتبوو لە بازیان و جێژنیکانەکاندا پلان بۆ دەستەخوشکی دوێنێی دابرێژێت، بەڵکو وای پێیوترابوو ئەگەر بەدوای دەستەخوشکی شۆرشگێرو نێری تێگەیشتوو گەنجی بەئۆمێدی، ئەگەر لەزرگوێز لات نەدا، گومانت نەبێت لە کۆیە دەستت دەکەوێت.

    یەڵدا بۆ چەندەمین جار لەناو کەمپەکاندا بەفیشەکێک کوژرا، کوژرانی یەڵدا لەناو کەمپەکانی کۆمەڵەدا کارەساتێکی دڵەتەزێنی مرۆی و کۆمەڵایەتیی و گرنگتر لەئێستای بارودۆخی هێزە سیاسییەکانماندا سیاسییە، هەموومان و هەمووتان لەبیستنی هەواڵی کوژرانی یەڵدا جیا لەوەی کێ کوشتوویەتی و بۆ کوشتوویەتی دڵگران بووین و بوون، یەڵدا بەر لەهەموو شتێک مرۆڤ بوو، دوای ژن بوو، دواتر کورد بوو، ئینجا ژنە پێشمەرگەیەک بوو، کە تەمەنی لەروانگە پاکەکەی خۆی بۆ ئامانجە پیرۆزەکەی دانابوو، یەڵدا چەپ بووبێت یان راست، لائیک بووبێت یان بەدین گرنگ نییە، گرنگ ئەوەیە لەناو کەمپێکیدا و لەدەرەوەی زێدەکەی کوژرا، لەکاتێدا بەخەیالی خۆی هاتبوو وەکوو پێشمەرگەیەکی ژن لەپێناو ئامانجەکەیدا بجەنگێت. هەر بۆیەش یەڵدا نوێنەری دەیان یەڵدایە کە زیاتر لە دوو دەیەیە لەناو کەمپەکانی کۆمەڵەو دیموکراتدان، ئەوان بەو ئۆمێدەوە هاتبوون نەک بۆخۆیان بژین، بگرە بەلێنی ژیانیان بەنەتەوەیەکی ژێردەست لەرۆژهەڵاتی کوردستان دابوو، بەڵام ئەو بەلێندەرانی ئۆمێدە هێدی هێدی کۆژران و خۆیان سووتاندو سوتێنران و زۆربەشیان بەجەستە زیندوو بەڵام بەرووح مردوون، چوونکە مرۆڤی شۆرشگێر بەئامانجەوە زیندووە، بەکردارەوە دەمێنێت، بەهەستەوە دەژیت، ئەگەر یەکێک لەوانە لەشۆرشگێر سڕایەوە، تەنیا جەستەی دەمێنێت، جەستەیەک کەچیتر ناتوانێت کەمتر لەپێشووی بژیت، ناتوانێت لەدەرەوەی بازنەی ئەو شۆرشگێریەوە نەفەس بکێشێت کەبە گڕوتینەوە خۆی بۆ لەئاوو ئاگر دەداو دوایش ئاگرە بەتینەگەی بەئاوی ساردی کۆیەو زرگوێز وەها کوژایەوە کە لەکتێبەکاندا بەدوای هەڵمەکەیدا دەبێ بگەرێین. یەڵداکان نەهاتبوون شەری موهتەدی و هیجری و بارام و ئیلخانی زادەو عەزیزی بکەن، ئەوان ئاواتیان بوو وێنەکەیان جارێک لەگەڵ ئەوانە هەبێت و شانازی پێوەبکەن، و لەسەر سینگی دابنێن و لەبەرەکانی بەرگریدا هەرجارەو چاوێک لەوێنەی خۆیان و سەرکردەیان بکەن و ورە بگرن، یەڵدا نەهاتبوو لە بازیان و جێژنیکانەکاندا پلان بۆ دەستەخوشکی دوێنێی دابرێژێت، بەڵکو وای پێیوترابوو ئەگەر بەدوای دەستەخوشکی شۆرشگێرو نێری تێگەیشتوو گەنجی بەئۆمێدی، ئەگەر لەزرگوێز لات نەدا، گومانت نەبێت لە کۆیە دەستت دەکەوێت.
    یەڵدا نەیدەزانی و نەیدەفامی بۆ دەبێ رقی لە هاورێی دوێنێی بێتەوە، یەڵدا پێی وابوو کورد و رۆژهەڵات و ئاسۆ و تیشک بەرەو دوژمن لەبۆسێدان، نەک خەریکی بنکۆڵکردنی براکەیانن. یەڵداکان لەو دونیاش لەتێکدانی فەلسەفەی هاتنی بۆ پێشمەرگایەتی لە لایەن سەرۆکی پیًَشمەرگەکانەوە تێنگاکات. یەڵدا نەهاتبوو لەپێناو دانیشتن و شەرەقسەی ناوخۆیدا برسی و بێ جڵ بێت، نەهاتبوو لەسەر جادەکاندا ماڵ بەکۆل بێت و چاوەرێی کەرەمێک لەیەکێتی و پارتی بکات، ئەو هاتبوو هاوپەیمانی ئەوان بێت لەبنیادنانی کوردستانێکی گەورەدا. یەڵداکان برسی و نائۆمێد و لەشوناسی شۆرشگێری سڕاوەبوون، باورەتان بێت ئەوانە کەم نین و زۆرن بۆ ئەوەی لەمەترسی کوژران بەدەستی کەسێکی نائۆمێدتر لەخۆیدا بێت. بەڵام بەداخەوە لەو چەند رۆژەدا کە بەسەر کۆژرانی یەڵدا دا تێپەری، زۆر بوون ئەو کەسانەی بەناو رۆژنامەنووس! و بەبیر ڕووناکبیر!و بەهەست مافی مرۆڤی! خەریکی نقورچگرتن لەلایەنێک بوون و جارێکیتر کەوتنە کایەی نەشیاوی سیاسیی بەرامبەر بەخود، زۆر کەسی سەمپاتی حزبی دیموکراتم بینی کە ناوەرۆکی کارەساتی یەلدایان فیدای تانەلێدان لەلایەنێک کرد، ئەوەش جاری پێشووتر بەپێچەوانەوە لەکۆمێنتی کۆمەڵەیەکان بەرامبەر بە خۆسوتاندنی ژنێک لەکۆیە بینراو بیسترا. هەر بۆیە بەباوەری من کارەسات گەورەتر لەکوژرانی یەڵداکان ئەوەیە پەیامی ئەو سوتان و کورژران و خۆکوژی و خۆسوتاندنمان لەناو کەمپێکی شۆرشگێریدا بخەینە پەراوێزی قسە فرێدانەکان بۆ ئەوەی وەناوچاوانی ئەوەی پێم خۆشە بکەوێت، بکەین. پرسیار لێرەدا ئەوەنییە کە یەڵدا لەکوێ کوژراو کێ کوشتی، بەڵکو پرسیاری سەرەکی و گرنگ ئەوەیە کە یەڵداکان بۆ خۆیان دەکوژن و دەسوتێنن، ئەوە ئەو پرسیارەیە کە سەرکردەکان خۆیان لێ کەر کردووە، و چاوەرێی هیمەتی ئێوەی رۆژنامەنووس و کۆمێنت نووسی فەیسبووک بووین بەدوای ئەو هۆکارانەدا بگەرێن و لەهەڵمەتێکدا ورە و فۆرمی نوێی خەبات پێناسە بکەنەوەو ئاسۆیەکی ئەمرۆی بەرەو ئامانج ببیننەوە، نەک بۆ جارێکیتر وەڵامی ئەو پرسیارانە لەیەڵداکان لێل تر و دژوارتر بکەنەوە، ئەرێ بۆ لێرەم، لەپێناو چیدا برسیم، قەرار بوو دووژمن رژێمی ئێران بیًت، نەک هاورێ خۆشەویستەکەم؟ بۆ دەبێ رقم لێت بێ هاورێ؟

  10. : ڕۆژپڕێس / Rojpress Says:

    باوكی یەڵدا “گومان دەكەم ئەو گوللەیەی لای پۆلیسە ئەوەنە بێت كە یەڵدای كوشتوە”
    17 / 12 / 2011

    باوكی یەڵدا
    “گومان دەكەم ئەو گوللەیەی لای پۆلیسە ئەوەنە بێت كە یەڵدای كوشتوە”
    پێشمەرگەیەكی كۆمەڵەی شۆڕشگێڕی زەحمەتكێشانی كوردستانی ئێران دوو گوللە دەنێت بە هاوسەرەكەیەوەو لە ئیفادەكەشیدا لەلای پۆلیس دەڵێت” خەریكی پاككردنەوە سیلاحەكەم بووم دوو گوللە دەرچوو بەر ژنەكەم كەوت”.
    كاتژمێر 11ی شەوی 11/12/12/2011 لە ئۆردوگای باینجانی كۆمەڵەی شۆڕشگێڕی زەحمەتكێشانی كوردستانی ئێران پێشمەرگەیەك بەناوی (ش) دوو گوللە دەنێت بە (م)ی تەمەن 28ساڵی هاوسەرییەوە، دەست بەجێ بنكەی پۆلیسی بەردەقارەمان دەگەنە سەر روداوەكەو (ش) دەستگیر دەكەن لە ئیفادەكەیدا لەلای پۆلیس(ش) دەڵێت”خەریكی پاككردنەوەی چەكەكەم بوم دوو گوللە لە دەستم دەرچوو”، ئەفسەری بنكەی پۆلیسی بەردەقارەمان نەقیب جەزا حەمە ئەمین ئاماژە بۆ ئەوە دەكات كە شەوێك پێش روداوەكە (م) كە ناسراوە بە یەڵدا پەیوەندی كردووە بە كەسو كارەكەیەوەو دەڵێت” بە پێی لێكۆڵینەوەكانی ئێمە 24كاتژمێر پێش روداوەكە یەڵدا بەتەلەفۆن بە باوكی وتوە فریام كەون مێردەكەم هەڕەشەم لێدەكاتو خراپە لەگەڵم”، ئەو ئەفسەرە باسی لەوەكرد كە ئەو پەیوەندییە تەلەفۆنیە جێ گومانە بۆیە ناتوانرێت بوترێت كوشتنی بە ئەنقەست بوە یان قەزاو قەدەر تاوەكو لێكۆڵینەوەی تەواو لە روداوەكە نەكرێت، بەڵام سادقی ئەو پیاوە ریش سپەیەی بەزەنگێك هەواڵی مردنی كچەكەی پێدراو لە ئێرانەوە گەشتە سلێمانیو بەدەم هەناسە هەڵكێشانەوە وتی”من دەزانم كچەكەم كوژراوەو لەدەست دەرچوون نەبووە لەبەر ئەوەی شەوێك پێش مردنەكەی زەنگی بۆ دامو وتی وەرن فریام كەون شوەكەم زۆر خراپە لەگەڵم”، ئەو پیاوە بەردەوام ئاماژەی بۆ كوژانی كچەكەی دەكردو پێی وابوو ئەو گووللەیەشی كە لەراپۆرتی پزیشكی دادوەریدا ئاماژەی پێكراوە ئەو گوللەیە نیە كە بوەتە هۆی مردنی كچەكەیو وتی”گومان دەكەم ئەو گوللەیەی هاوپێچە بە راپۆرتی پزیشكی دادوەری گوللەی ئەو سیلاحە بێت كە لەلای پۆلیسی چونكە من شارەزاییم لەو بوارەدا هەیەو بۆخۆم سەرباز بووم”.
    ئەو ئەفسەرەی بنكەی پۆلیسی بەردەقارەمان باسی لەوە كرد كە پێش ئەوەی گوللەكان بەر جەستەی یەڵدا بكەون بەر زەویەكە كەوتوەو وتی”هەروەك لە راپۆرتی پزیشكی دادوەریشدا ئاماژەی پێكراوە گوللەیەكیان بەسەرتیخ بەرملی یەڵدا كەتوەو دواتر بەردیواری ژورەكەیان كەوتوەو گوللەیەكی تریشیان راستەو خۆی بەسنگی چەپی واتە سەر دڵی كەوتوەو دەست بەجێ گیانی لەدەست داوە”.وتیشی”تا ئێستا لێكۆڵینەوە لە روداوەكە بەردەوامەو هاوسەری كوژاروەكەش بە پێی ماددەی 406 لە یاسای سزادانی ئێراقی دەستگیر كراوە”.

  11. : ڕۆژپڕێس / Rojpress Says:

    ناهید به‌همه‌نی: دامه‌نه‌ی ڕه‌خنه‌کان له‌ فه‌رهه‌نگێکی به‌جێ و لۆژیک ده‌رچوه‌
    http://www.voanews.com/kurdish/news/nahid_17dec11-135793778.html
    له‌ چه‌ند ڕۆژی ڕبوردوودا خانمه‌ پێشمه‌رگه‌یه‌کی کۆمه‌ڵه‌ی زه‌حمه‌تکێشانی کوردستانی ئێران گوایه‌ به‌ ده‌ستی هاوسه‌ره‌که‌ی له‌ ناو ئۆردوگایه‌کی کۆمه‌ڵه‌دا کوژرا، له‌ سه‌ر ئه‌نجام سه‌ر و سدایه‌کی لێکه‌وته‌وه‌ و کۆمه‌ڵێک له‌ چالاکان، نووسه‌ران و رۆشه‌نبیران له‌و باره‌یه‌وه‌ به‌یاننامه‌یه‌کیان ده‌رکردوون و ڕه‌خنه‌ له‌ کۆمه‌ڵه‌ ده‌گرن.

    خانم ناهید به‌همه‌نی به‌رێوه‌به‌ری کۆمه‌ڵه‌ی رێکخراوه‌ی ژنانی ڕۆژهه‌ڵات له‌ هه‌ڤپه‌ێڤینێکدا له‌گه‌ڵ به‌شی کوردی ده‌نگی ئه‌مریکا ده‌ڵێت ئه‌وه‌ندی من بزانم ڕه‌خنه‌و گازنده‌کان چوه‌ته‌ سه‌ر ئه‌وه‌ی که‌ بۆ چی کۆمه‌ڵه‌ له‌و بابه‌ته‌وه‌ زانیاریه‌کی زۆرتری نه‌داوه‌ به‌ خۆێنه‌ران یان بیسه‌ران. خانم به‌همه‌نی که‌ هه‌ر وه‌ها ئه‌ندامی کۆمیته‌ی ناوه‌ندی کۆمه‌ڵه‌ی زه‌حمه‌تکێشانی کوردستانی ئێرانه‌ ده‌شڵێت ئێمه‌ تا ئێستا لێکوڵینه‌وه‌یه‌کی بنه‌ره‌تیمان له‌ لایه‌ن پۆلیسی خۆجه‌ییه‌وه‌ به‌ ده‌ست نه‌که‌وتوه‌ وا دیاره‌ لێکوڵینه‌وه‌کان هه‌ر به‌رده‌وامه‌.

    ده‌توانن له‌ ڕێی کلیککردنی ئه‌و فایله‌ ده‌نگیه‌ی سه‌روه‌ی ده‌سته‌ چه‌پ گوێبیستی ته‌واوی گفت و گۆکه‌ بن که‌ ماوه‌که‌ی 9:30 خوله‌که

  12. : ڕۆژپڕێس / Rojpress Says:

    مه‌هین شوکرلاپور: ئه‌و تیره‌ی له‌ دڵی یه‌ڵدای دا له‌ دڵی هه‌مو ژنانی دا
    http://www.voanews.com/kurdish/news/mahin_17dec11-135793988.html

    کۆمه‌ڵێک له‌ چالاکان، نووسه‌ران و رۆشه‌نبیران له‌ باره‌ی کوشتی یه‌ڵدا له‌ لایه‌ن هاوسه‌ره‌که‌یه‌وه‌ له‌ ئوردوگایه‌کی کۆمه‌ڵه‌دا له‌ باشوری کوردستان به‌یاننامه‌یه‌کیان ‌ ده‌رکردون شه‌رمه‌زاری ئه‌و کاره‌ ده‌که‌ن و ڕه‌خنه‌ له‌ کۆمه‌ڵه‌ ده‌گرن و له‌به‌رامبه‌ردا به‌رپسانی کۆ‌مه‌ڵه‌ به‌ توندی وه‌ڵامی ئه‌و ره‌خنانه‌یان داونه‌ته‌وه‌ و به‌ نه‌یارانی کۆمه‌ڵه‌ ناویان ده‌به‌ن.
    ‌مه‌هین شوکرلاپور چالاکی مافه‌کانی ژنان له‌ هه‌ڤپه‌ێڤینێکدا له‌گه‌ڵ به‌شی کوردی ده‌نگی ئه‌مریکا ده‌ڵێت ئێمه‌ چاوه‌روانی ئه‌وه‌ بوین کۆمه‌ڵه‌ وه‌کو لو مانفیسته‌که‌ێدا هاتوه‌ به‌رگری له‌ یه‌ڵدا بکات، ده‌شڵێت ئێمه‌ هیچ سنورێکمان نه‌به‌زاندوه‌ و داوی روونکردنه‌وه‌مان کردووه‌ ئه‌م رووداوه‌ چۆن بوه‌ و چۆن پێش هاتوه‌.
    ده‌توانن له‌ ڕێی کلیککردنی ئه‌و فایله‌ ده‌نگیه‌ی سه‌روه‌ی ده‌سته‌ چه‌پ گوێبیستی ته‌واوی گفت و گۆکه‌ بن که‌ ماوه‌که‌ی 10:39 خوله‌که

  13. ئوغوز Says:

    راگه‌یاندنی سكرتارییه‌تی كۆمه‌ڵه‌ سه‌باره‌ت به‌ مه‌رگی هاوڕێ مریه‌م سادقی

    10:09:13/12/2011

    به‌ داخه‌وه‌ رایده‌گه‌یه‌نین شه‌وی ١٢/دیسامبری/٢٠١١ هاوڕێ “مریه‌م سادقی” ناسراو به‌ یه‌ڵدا له‌ روداوێكی نه‌خوازراو دڵته‌زین دا گیانی له‌ ده‌ستداو دڵی پڕ له‌ هیوای له‌ لێدان كه‌وت. له‌ لایه‌ن سكرتارییه‌تی كۆمه‌ڵه‌وه‌ سه‌ره‌خوشی له‌ بنه‌ماڵه‌و كه‌س وكاری هه‌موو پێشمه‌رگه‌كانی كۆمه‌ڵه‌ ده‌كه‌ین.
    هاوڕێ یه‌ڵدا ساڵی ١٣٨٨ی هه‌تاوی به‌ریزه‌كانی كۆمه‌ڵه‌ په‌یویست بوو و تا كاتی گیانبه‌ختكردنی وه‌ك پێشمه‌رگه‌یه‌كی هه‌ڵسوڕاو له‌ به‌ڕێوه‌بردنی ئه‌ركه‌ حیزبیه‌كانیدا دریغی نه‌كرد، به‌ڵام به‌داخه‌وه‌ مه‌رگی نابه‌وه‌خت ده‌رفه‌تی ئه‌وه‌ی پێنه‌دا تا زیاتر له‌ پێناو كۆمه‌ڵه‌ وئامانجه‌ به‌رزه‌كانیدا خه‌بات بكا.
    جێی ئاماژه‌یه‌ به‌ بۆنه‌ی مه‌رگی هاوڕێ “یه‌لدا” جارێكێتر نه‌یارانی كۆمه‌ڵه‌ له‌ سه‌ر تۆڕی ئینترنەت و له‌ سه‌ر فه یس بووك ده‌ستیان داوه‌ته‌ ته‌بلیغاتێكی دوژمنكارانه‌ به‌ دژی كۆمه‌ڵه‌ و پێشمه‌رگه‌ی كۆمه‌ڵه‌ به‌ كوشتنی ژن تاوانبار ده‌كه‌ن، ئێمه‌ هه‌موو كه‌س دڵنیا ده‌كه‌ین ئه‌م روداوه‌ نه‌خوازراو بووه‌و لێكۆلێنه‌وه‌ی پۆلیس و پزیشكی یاسایی ئه‌م راستییه‌ی سه‌لماندووه‌و ئیدیعای نه‌یارانی كۆمه‌ڵه‌ به‌ درۆ ده‌خاته‌وە.

    سكرتارییه‌تی كۆمه‌ڵەی شۆڕشگیری زەحمەتکێشان کوردستانی ئێران
    http://www.asoyroj.com/details.aspx?=News&ID=5072&Babat=1

    راگه‌یاندنی ژماره‌ دووی سكرتاریه‌تی كۆمه‌ڵه‌ سه‌باره‌ت به‌ روونكردنه‌وه‌ی زیاتری رووداوی دڵته‌زینی گیان له‌ ده‌ست دانی هاوڕێ “مریه‌م سادقی”

    به‌م جۆره‌ له‌ رێگه‌ی ئه‌م راگه‌یاندنه‌وه‌ سه‌باره‌ت به‌ رووداوی دڵته‌زێنی مه‌رگی یه‌كێك له‌ پێشمه‌رگه‌كانی كۆمه‌ڵه‌ به‌ناوی مریه‌م سادقی، ناسراو به‌ یه‌لدا، كه‌ له‌ شه‌وی 12ی دێسامبر له‌ ئۆردوگای بازیان روویدا، چه‌ند روونكردنه‌وه‌ی پێویست بۆ بیروڕای گشتی راده‌گه‌یه‌نین:

    1- راگه‌یاندنی ژماره‌ی یه‌كی سكرتاریه‌تی كۆمه‌ڵه‌ له‌م بابه‌ته‌وه‌، له‌سه‌ر بنه‌مای لێكۆڵینه‌وه‌ی سه‌ره‌تایی پۆلیس و به‌رپرسی لێكۆڵینه‌وه‌ له‌ په‌روه‌نده‌ی مه‌رگی هاوڕێ مریه‌م سادقی بوو كه‌ رۆژێك پاش رووداوه‌كه‌ بلاَوكرایه‌وه‌. بۆ رونكردنه‌وه‌ی زیاتر سكرتارییه‌تی كۆمه‌ڵه‌ جارێكیتر رۆژی پێنج شه‌ممه‌ رێكه‌وتی 15/12/2011 په‌یوه‌ندی به‌ نه‌قیب جه‌زا حه‌مه‌ ئه‌مین، به‌رپرسی پۆلیسی ناوچه‌ی به‌رده‌قاره‌مانه‌وه‌ كرد و ئه‌ویش ته‌ئكیدی كرده‌وه‌ هێشتا بۆ پۆلیس ودادگا ده‌رنه‌كه‌وتووه‌ كه‌ كوژرانه‌كه‌ خوازراو بووبێ‌، هه‌روه‌ها ته‌ئكیدی كرده‌وه‌ كه‌ ئه‌و له‌ هیچ وتوویژێكدا ئه‌وه‌ی نه‌وتووه‌ كه‌ دڵنیان روداوكه‌ خوازراو بووه‌، له‌ درێژه‌دا وتی به‌لاَم لێكوڵینه‌وه‌ بۆ دانی بڕیاری كۆتایی دادگا به‌رده‌وامه‌ .

    2- كه‌سی تۆمه‌تبار به‌ كوشتنی هاوڕێ مریه‌م، هه‌ر له‌ له‌حزه‌ی یه‌كه‌مه‌وه‌ ته‌حویلی پۆلیس و دادگا دراوه‌ و تا ئێستاش پڕۆسه‌ی لێكۆڵینه‌وه‌ بۆ راگه‌یاندنی حوكمی كۆتایی سه‌باره‌ت به‌م په‌روه‌نده‌یه‌ له‌ لایه‌ن دادگاوه‌ درێژه‌ی هه‌یه‌.

    3- بڕیاری دادگاو ئاكامی لێكۆلینه‌وه‌ی پۆلیس هه‌رچییه‌ك بێت، واته‌ قه‌تڵی خوازراو یان نه‌خوازراو له‌ لایه‌ن هاوسه‌ری هاوڕێ مریه‌م بێ‌، ئێمه‌ وه‌ك كۆمه‌ڵه‌ پێملی ئه‌م حوكمه‌ین و نه‌شمان ویستووه‌ هیچ په‌رده‌پۆشییه‌ك بۆ په‌روه‌نده‌ی كه‌سی تۆمه‌تبار به‌ كوژرانی هاوڕێ مریه‌م بكه‌ین.

    4- ئێمه‌ ده‌زانین خه‌ڵكانێك به‌ نییه‌تی پاك و به‌ په‌رۆشه‌وه‌ له‌ ئاست ئه‌م رووداوه‌ دڵته‌زێنه‌، هه‌ڵویستیان گرتووه‌ و ئه‌مه‌ جێگه‌ی پێزانینه‌. ئێمه‌ زانینی‌ راستییه‌كان به‌ مافی‌ هه‌مووان ده‌زانین و ئه‌م راگه‌یاندنه‌ش بۆ روونكردنه‌وه‌ی‌ زۆرتری‌ رای‌ گشتی‌ و دڵنیا كردنه‌وه‌ی‌ هه‌موو ئه‌و دۆستان و دڵسۆزانه‌ و ره‌واندنه‌وه‌ی‌ ته‌م و مژی‌ دروستكراو له‌سه‌ر ئه‌و رووداوه‌ دڵته‌زێنه‌یه‌.

    سكرتاریه‌تی كۆمه‌ڵه‌ی شۆڕشگێڕی زه‌حمه‌تكێشانی كوردستانی ئێران
    18ی دێسامبری 2011

    ڕاگه‌یاندنی کۆمه‌ڵه‌ی ژنانی ڕۆژهه‌ڵات به‌ بۆنه‌ی مه‌رگی هاوڕێ مه‌ریه‌م سادقی ( یه‌ڵدا)

    05:22:17/12/2011

    به‌ داخ و په‌ژاره‌یه‌کی زۆره‌وه‌ شه‌وی 12ی دێسامبری 2011 هاوڕێ” مه‌ریه‌م سادقی” ناسراو به‌ ” یه‌ڵدا ” له‌ ڕوداوێکی نه‌خوازراو و دڵته‌زێندا گیانی ئازیزی له‌ ده‌ست دا .

    جێگای ئاماژه‌یه‌ هاوڕێ یه‌ڵدا له‌گه‌ڵ پرۆسه‌ی یه‌کگرتنه‌وه‌ی ڕیزه‌کانی کۆمه‌ڵه‌ و گه‌ڕانه‌وه‌ی هاوڕێانی جیا بوه‌ له‌ کۆمه‌ڵه‌ی شۆڕشگێر په‌یوه‌ست بوو به‌ ڕیزی پێشمه‌رگه‌کانی کومه‌ڵه‌ و دواتریش بوو به‌ ئه‌ندامی ڕێکخراوی کۆمه‌ڵه‌ی ژنانی ڕۆژهه‌ڵات . ئاشنای ئێمه‌ وه‌كوو هاوڕێیانی يه‌ڵدا له‌ كۆمه‌ڵه‌ی ژنانی ڕۆژهه‌ڵات له‌ گه‌ل ئه‌و كچه‌ روح سووكه‌، تيَكوشه‌ره‌ به‌ داخه‌وه‌ زورنه‌بوو و مه‌رگی نابه‌وه‌ختی مه‌ودای نه‌دا تا دوستايه‌تيه‌كه‌مان چڕوپڕتر بكه‌ين و قووڵتر بچينه‌ نێو دنيای مه‌راره‌ت و ناهومێديه‌كانيه‌وه‌،هه‌رچه‌نده‌ یه‌ڵدا که‌م له ‌ناوماندا بوو به‌ڵام جێگای خاڵیه‌ له‌ نێو چالاکانی ڕێکخراوه‌که‌ ماندا ،دیاره‌ گیان له‌ ده‌ست دای ئه‌م ئازیزه‌ چ خوازراو و چ نه‌خوازراو هیچ له‌ گرنگی هه‌بوونی ئه‌م کچه‌ شوخ و شه‌نگ و تێکۆشه‌ره‌ی كۆمه‌ڵه‌ له‌ داهاتووی چالاکیه‌کانی کۆمه‌ڵه‌ی ژنانی ڕۆژهه‌ڵات و سه‌رکه‌وتنی بزوتنه‌وه‌ی ژنی کورد له‌ کوردستانی ڕۆژهه‌ڵات که‌م ناکاته‌وه‌ .

    گيان له‌ ده‌ست دانی يه‌ڵدای خوشه‌ويست به‌ تايبه‌تی بۆ ئێمه‌ وه‌كوو هاوڕێ و ئه‌ندامی ڕێكخراوه‌كه‌مان گه‌لێک جێگای داخ و په‌ژاره‌یه‌. ئێمه‌ چالاکانی “کۆمه‌ڵه‌ی ژنانی ڕۆژهه‌ڵات ” به‌ ناوی خۆمان و سه‌رجه‌م ئه‌ندامانی ڕێکخراوه‌که‌مان پرسه‌ و سه‌ره‌خۆشی خومان ئاراسته‌ی بنه‌ماڵه‌ی به‌ڕێزی هاوڕێ ” یه‌ڵدا “و دوستان و نزیکانی ده‌که‌ین و خۆمان به‌ شه‌ریکی خه‌می هه‌موو لایه‌ک ده‌زانین .

    http://www.asoyroj.com/details.aspx?=News&ID=5088&Babat=1

وەڵامێک بنووسە

Fill in your details below or click an icon to log in:

WordPress.com Logo

You are commenting using your WordPress.com account. Log Out / گۆڕین )

Twitter picture

You are commenting using your Twitter account. Log Out / گۆڕین )

Facebook photo

You are commenting using your Facebook account. Log Out / گۆڕین )

Google+ photo

You are commenting using your Google+ account. Log Out / گۆڕین )

Connecting to %s


%d هاوشێوەی ئەم بلۆگەرانە: