دوکتور قاسملوو، پاراستنی پره‌نسیپ، خۆ به‌‌خت کردن بۆ ئامانج و جێگره‌کانی/ حه‌سه‌ن ئه‌یوبزاده

کریس کۆچرا نووسه‌ر و کوردناسی ناوداری فه‌ره‌نسی، له‌ کتێبه‌که‌یدا به ناوی بزووتنه‌وه‌ی میلله‌تی کورد و سه‌ربه‌‌خۆییخوازیی، باس له وته‌کانی دوکتور قاسملوو ده‌کا، که له ئاخر ساته‌کانی ژیانیدا له‌گه‌ل کوژه‌ره‌کانی خۆی کردبووی. سیاسه‌تڤانی کورد به‌رێز عزیز ماملێ ئه‌و کتێبه‌ی له زمانی فه‌ره‌نسیی‌یه‌وه کردووه به‌فارسی وئه‌و به‌شانه‌ی که‌لێره‌دا هاتوون، له لایه‌ن نووسه‌ری ئه‌م وتاره‌وه کراون به کوردیی.  به‌خته‌وه‌رانه وه‌رگێردراوی سه‌رجه‌می وتاره‌که‌ی دوکتور قاسملوو که له‌لایه‌ن پۆلیسی قه‌زایی ئوتریشه‌وه کراوه به ئاڵمانیی و دراوه به وه‌کێلی په‌روه‌نده‌که‌ی دوکتور قاسملوو که له‌به‌ر ده‌سته. وه‌رگێڕی ره‌سمیی ده‌زگای پۆلیسی دادوه‌ریی ئوتریش به‌‌ هۆی ئاشنا نه‌بوون له‌گه‌ڵ ناوی که‌سانێک که له‌و دۆسییه‌‌‌دا باسیان کراوه، به‌شێک له ناوه‌کانی به هه‌ڵه بێژه‌ی(تلفظ) ‌کردوون و ‌ نووسیونی. ژماره‌یه‌ک له‌و چه‌مکه سیاسیی‌یانه‌‌ش که دوکتورقاسملوو به فارسی که‌لکی لێوه‌رگرتوون و کراون به ئاڵمانیی ، مه‌به‌ستی دوکتور قاسملوو به ته‌واوی ده‌رنابڕن . هیوادارم بۆ رێبه‌رایه‌تی حدکا بگونجێ که له‌ده‌رفه‌تێک دا ئه‌و دوکۆمێنته مێژوویی‌یه بڵاوبکاته‌وه.

پیتر پیلچ نووسه‌ری کتێبی ئیسکۆرت به‌ره‌و تاران باس له 10 شریت له وتووێژه‌کانی دوکتور قاسملوو له‌گه‌ل تێرۆریسته‌کانی کۆماری ئیسلامیی له شاری ڤییه‌نی وڵاتی ئوتریش ده‌کا که له ژێر ده‌ستی پۆلیسی قه‌زایی شاری ڤییه‌‌ن‌دا بووه. پاش وه‌رگێرانی به‌شێکی که‌می ئه‌و ئاخر وتانه‌ی دوکتور قاسملوو به زمانی ئاڵمانی، سه‌رجه‌می شریته‌کانیان داوه به مه‌لا عه‌بدوڵڵا حه‌سه‌ن‌زاده. مخابن تا ئێستا ئه‌و به‌ڵگه مێژوویی‌یه نه‌ بڵاوکراوه‌ته‌وه و نه‌ که‌سیش ده‌زانێ لای کێ‌یه و بۆچێ بڵاو ناکرێته‌وه و له‌به‌رچی رێگه‌ ناده‌ن، خه‌لکه‌که‌مان له رووداوه‌کانی پشتی په‌رده‌ی ئه‌و تێڕۆره‌ ئاگادار بێ؟ هیوادارم ئه‌و دۆکۆمێنته مێژوویی‌یه له ژێرده‌ستی رێبه‌رایه‌تیی حدکادا بێ و رێگه‌ بدا له ده‌رفه‌تێک‌دا بڵاو بکرێته‌وه. نووسه‌ری ئه‌م وتاره کتێبه‌که‌ی دوکتور پیلچی کردووه به کوردیی وتا ئێستا له باشوری کوردستان دوو جار چاپ کراوه و بڵاو بووه‌ته‌وه.

دوچاپی پێشووی ئه‌و کتێبه به‌هۆی پێدانه‌چوونه‌وه‌ی وه‌رگێر، ته‌ژی له هه‌ڵه‌یه. له‌دادێیه‌کی نه‌دووردا ئه‌گه‌ر رێگا بدرێ بۆ جارێکی دیکه بۆ یادو بیره‌وه‌ریی رێبه‌رانی شه‌هید، دوکتور قاسملوو و دوکتور شه‌ره‌فه‌که‌ندیی و سه‌تان کادرو پێشمه‌رگه‌ی تێرۆرکراو هه‌زاران بریندار و ده‌رمانداوکراو و راکردوو و ئاواره‌ی هه‌نده‌ران و ئه‌وبه‌شه‌ی که له قه‌فه‌زی کۆیه‌‌دان و کراونه‌ته‌ جیره‌وه‌رگری ینک و ته‌نانه‌ت به په‌نابه‌ریش ناناسرێن و هه‌رکاتێ قاتڵه‌که‌ی دوکتور قاسملوو ئیراده‌ بکا، سه‌رکردایه‌تی ینک له قه‌وه‌زی پلاستیکیی‌دا ئاودیویان ده‌کاته‌وه، پێشکه‌ش ده‌که‌م. ئه‌وه‌ی که لێره‌دا کراوه به کوردیی به‌شێک له‌و وتووێژانه‌یه که کریس کۆچرا له‌ یه‌کێ له شریته‌کانی وه‌رگرتوون که سه‌رتر باسیان کرا.

“دوکتور قاسملوو له وتووێژ له گه‌ل تێرۆریسته‌کانی کۆماری ئیسلامیی له‌مه‌ر خودموختاری و رێگه‌‌چاره‌‌‌ی مه‌سه‌له‌ی نه‌ته‌وه‌کان له ئێران، به شێوه‌یه‌کی که تا ئه‌و کاته باسی نه‌کردبوو، ئاخڤی بوو.
کریس کۆچرا ده‌نووسێ:
” پرسیار و وه‌ڵامی لایه‌‌نه‌‌ ئێرانییه‌کان له وتووێژه‌کانیاندا که دڵنیا بوون هه‌رگیز ئاشکرا ناکرێن ، حاڵه‌تی رووحیی و ده‌روونیی به‌رپرسانی کۆماری ئیسلامیی ئێران نیشان ده‌ده‌ن که [ رێبه‌رانی کۆماری ئیسلامیی] له نێوان پێویستیی وه‌‌شوێن که‌وتنی بۆچوونی سیاسیی نوێ و [ ئیده‌کانی] حه‌‌زره‌تی عه‌لی‌دا سه‌رگه‌ردان بوون.

له کاسێتی ژماره‌3 دا دوکتور قاسملوو ده‌ڵێ:
“به داخه‌وه کاتێکی زۆرمان له‌ده‌ست چووه. به‌لام ده‌بێ بگوترێ له بابه‌تێکی ئاوا گرنگ‌دا نابێ په‌له بکرێ. له دیداری رابردوودا له‌سه‌ر دوو بابه‌تی سه‌ره‌کیی ئاخاوتین:
“قبووڵی بنه‌مای خودموختاری”
“قبووڵی بنه‌مای ئازادیی تێکۆشانی حیزبی ئێمه له نێوخۆی وڵاتدا.”
له‌مه‌ر خودموختاری وڵامی ئێوه ئه‌وه بوو که له‌م کاته‌دا، به‌رپرسانی کۆماری ئیسلامیی نایپه‌ژرێنن.
له مه‌ر دووهه‌مین مه‌سه‌له ، له کۆبۆنه‌وه‌کانی ده‌فته‌ری سیاسی‌‌دا باسمان کردووه که:
” ئایا پێشمه‌رگه چه‌کی خۆی ده‌پارێزێ یان نا؟ ده‌بێ بڵێم ده‌فته‌ری سیاسی له‌و باوه‌ڕه‌دایه که، دانانی چه‌ک مومکین نییه. هاورێکانم ده‌ڵێن: ” تا ئه‌و کاته‌ی به ویستی خه‌لک نه‌گه‌یشتووین، چه‌که‌کانمان دانانێین. چۆن ده‌کرێ چه‌که‌کانمان دابنێین؟ ئێمه راست بۆ ئه‌و مافانه چه‌کمان هه‌ڵگرتووه… له‌‌هه‌ر حالدا ئێمه ده‌بێ له‌مه‌ر قبووڵی خودموختاری وتووێژ بکه‌ین.”

کریس کۆچرا ده‌ڵێ: بڵێی کوژه‌ره‌کان پاش بیستنی وته‌کانی د. قاسملوو بریاری کوشتنیان دابێ، یان به‌ر له‌و کاته بریاری کوشتنیان درابوو؟ خوێندنه‌وه‌ی ئه‌م به‌ڵگه‌یه سناریۆی خواره‌وه ده‌په‌ژرێنێ که پایه‌‌به‌رزانی ئێرانیی ده‌یانزانی بزووتنه‌وه‌ی قاسملوو زۆر لاواز بووه. ره‌نگه پێیان وابوو بێ و هیوادار بووبن که بتوانن به وه‌به‌رچاوگرتنی کارێکی ناته‌واو واته قانوونی کردنی حیزبه‌که‌ی د. قاسملوو رازی بکه‌ن. به‌لام قاسملوو بۆ راگه‌‌یاندنی ته‌‌شریفاتی خودموختاریی کوردستان له لایه‌ن رێبه‌رایه‌تی تازه‌وه [ مبه‌ست کابینه‌ی ره‌فسه‌نجانیی‌یه‌] پێداده‌گرێ.

نێردراوانی رژیم واته تێڕۆڕیسته‌کان پاش یه‌که‌م دیداری دوکتور قاسملوو و عه‌بدالله قادری، له گه‌ل به‌رپرسانی خۆیان پێوه‌ندیی ده‌گرن. ده‌ستووریان پێده‌درێ:
” بیانکوژن!”
کریس کۆچرا ده‌نووسێ که قاسملوو چه‌ند هه‌‌ڵه‌‌ی کرد: هه‌ڵه‌ی یه‌که‌می ئه‌وه‌بوو که زۆر ئاشتیخواز بوو. هه‌ڵه‌ی دووهه‌می ئه‌وه بوو که پێێ‌وابوو رژیم به هۆی دووده‌سته‌یی‌یه‌وه ده‌وام ناهێنێ.
قاسملوو له دروشمی خودموختاریدا خۆی قه‌‌تیس کرد بوو. هه‌موو ستراتێژی خۆی بۆ دیتنه‌وه‌ی هاوپه‌یمان له ئێراندا چێ کردبوو. چوون بۆلای موجاهیدین و به‌نی سه‌درله ئاخری ته‌مه‌نیدا له تێشکانی ئه‌و کاره‌ی ئاگادار کرد. ئه‌و تێگه‌‌یشت که پێکهێنانی به‌ره‌یه‌کی دێموکرات له ئێراندا کارێکی به‌سانیی نه‌بووه.

دوکتور قاسملوو ده‌یگوت :
ئێستا بۆ به‌رگری له مافه نه‌ته‌ویییه‌کانی خۆمان ته‌نیا کڵاشینکۆفه‌که‌مان پێیه. دێموکراسی، کارێکه وله‌درێژخایه‌ن دا خۆی ده‌رده‌خا. ( واته دێموکراسی و خودموختاریی لێک‌گرێ نادرێن و پێوههندیی ئۆرگانیکیان پێکه‌وه نی‌یه – وه‌رگێڕ)
قاسملوو یه‌که‌م که‌س بوو که جه‌ختی کرده سه‌ر ئه‌وه که کورده‌کان له ئێراندا ته‌نیا حه‌ڤده له سه‌تی حه‌شێمه‌ت پێک دێنن. له هه‌ر حالدا ئه‌و پرسیاره ده‌کرێ که ئایا باشتر نی‌یه له جیاتی هاوپه‌یمانێتی خه‌یاڵیی نه‌ته‌وه ژێرده‌سته‌کان له‌‌گه‌‌ل حیزبه نه‌ته‌‌وه‌ییه ‌کوردستانی‌یه‌کان، یه‌کگرتوویی په‌ره‌پێبدا و تێبکۆشێ ناکۆکیی خۆی له‌‌گه‌‌ڵ پارتی دێموکراتی کوردستان به سه‌رۆکایه‌تی مسعود بارزانی له نێو به‌رێ؟
کریس کۆچرا ده‌نووسێ : دوکتور قاسملوو چه‌ند مانگ پێش کوشتنه‌که‌ی ده‌یگوت:

” کام کورد خه‌ون به سه‌ربه خۆیی کوردستانه‌وه نابینێ؟ به‌لام مرۆڤ ده‌بێ واقیع بین بێ. چۆن ده‌کرێ سێ سنوور ده‌ستکاریی بکرێ؟ بۆ خه‌بات به مه‌به‌‌ستی سه‌ربه‌خۆیی سێ مه‌رج ده‌بێ هه‌بێ: بزووتنه‌وه‌ی کورد له هه‌‌موو لایه‌ک به‌ هێز بێ. ده‌بێ هاوپه‌یمانت له رۆژهه‌لاتی ناوه‌راست هه‌بێ. نه ته‌نیا له‌‌نێو گه‌لان له نێو ده‌‌وڵه‌ته‌کانیشدا پشتیوان پێویسته. ده‌بێ پشتیوانیی عه‌ره‌‌بستانی سعودی وه‌ربگیرێ. هیچ ده‌وڵه‌‌تێک پشتیوانیی له ئێمه‌ناکا.
کاتێ به قاسملوویان ده‌گوت خه‌بات بۆ خودموختاری، کورده‌کان دابه‌‌ش ده‌کا، ده‌یگوت: دابه‌ش کردنی کوردستان واقعییه‌ته. هه‌لومه‌رجی ده‌‌رچوونی له‌و وه‌زعه‌ به‌وجۆره پێناسه‌ ده‌کرد: ئه‌گه‌ر ئه‌و سێ‌ ده‌وڵه‌ته بریار بده‌ن بزووتنه‌وه‌ی کورد داپڵۆسن له‌و حاڵه‌ته‌دا بزووتنه‌وه‌کان ده‌بێ یه‌کبگرن و دروشمی خۆدموختاری وه‌لا بنێن.( وتووێژی دوکتورقاسملوو 14 ئۆکتۆبری 1988 )
کریس کۆچرا له دڕێژه‌ی باسه‌که‌یدا له‌سه‌ر وتووێژی دوکتور قاسملوو له‌گه‌ل صحرارودی و تێرۆریسته‌که‌ی دیکه‌ی کۆماری ئیسلامیی به‌م جۆره ده‌نووسێ:

” قاسملوو بێ راوه‌ستان خۆی وه‌کو سیمای خودموختاریخواز ده‌ناسێنێ و ده‌ڵێ: وه‌‌چه‌ی من دێموکراسیخواز و خودموختاریخوازه و داواده‌کا له‌گه‌لی وتووێژ بکه‌ن. ده‌ڵێ دوارۆژ خه‌ڵکی دیکه داوای زیاتر دێننه گۆڕێ.
دوکتور باس له مه‌سه‌له‌ی نه‌‌ته‌‌وه‌‌کان و گرفته‌‌کانیان ده‌کا. ده‌‌ڵێ ئێستا مه‌‌سه‌‌له‌‌ی تاتارستان ناگۆرنۆ قه‌ره‌باغ ، قه‌‌زاقستان، مۆڵداوی و باڵت هه‌یه که چاره‌‌نه‌‌کراو ماونه‌وه. ” ئێوه ده‌زانن کوردستان 900 کیلۆمیتر له سنووری ئێران پێک دێنێ… ئه‌گه‌ر مه‌سه‌له‌ی خودموختاری چاره‌سه‌ربکرێ شوێندانه‌ر ده‌بێ بۆکوردیش له وڵاتانی دیکه‌‌دا و ئه‌‌وان بۆ لای ئێران راده‌کێشرێن. ئه‌‌گه‌‌ر رێبه‌رانێک بیانه‌‌وێ نه‌‌وعێک کۆنفێدراسیۆن له رۆژهه‌لاتی نزیکدا دامه‌زرێنن له‌و شکڵه‌‌داخودموختاری کوردستان هه‌نگاوێک به‌‌ره‌و پێشه‌.
د. قاسملوو له مه‌ر وته‌کانی صحرارودی دژ به خودموختاری ده‌‌ڵێ: ئه‌و کۆسپانه‌ی که تۆ بۆ راگه‌‌یاندنی خودموختاری بژاردتن جێێ ره‌زامه‌‌ندی نین. ئێمه گه‌‌ڵاڵه‌‌یه‌‌کی ده‌‌مادده‌ییمان ئاماده‌‌کردووه ده‌‌یده‌ین به ئێوه. له‌‌مه‌ر کاتی به‌‌رێوه ‌‌بردنی خودموختاری و ورده‌کاریییه‌کانی گرفتێکمان له به‌‌ین دا نابێ. گرنگ ئه‌وه‌‌یه که ئامانجه‌‌کان قبووڵ بکرێن.
دوکتور قاسملوو بۆچوونی خۆی له‌‌سه‌ر خودموختاری روون ده‌کاته‌وه و ده‌ڵێ: “بۆ ئێمه چوار خاڵی بنه‌‌ره‌تی هه‌یه:
خودموختاری به مانای دابه‌‌شکردنی ده‌‌سه‌‌ڵاته.
زبانی کوردیی بۆ ئێمه بابه‌‌تێکی بنه‌‌ره‌تی‌یه،
دیاریکردنی حدودی ناوچه‌ی خودموختاره.
چواره‌مین مه‌‌‌سه‌له بۆ خه‌ڵکی کوردستان ئه‌‌ساسیی‌یه. ئه‌منییه‌ت ده‌‌بێ به خه‌‌ڵکی کوردستان بێ.
مه‌سه‌له‌ی دیاریکردنی حدودی سنوره‌کان ره‌‌نگه گیروگرفتی هه‌‌بێ. بۆ نموه‌نه ره‌نگه شاری ورمێ بۆ ئێوه شارێکی کوردیی نه‌‌بێ، به نه‌زه‌‌ری ئێمه شارێکی کوردانه.چونکه زۆربه‌‌ی دانیشتوانی کوردن. بۆ رێبه‌رایه‌تی ئاشبه‌تال رۆژهه‌ڵاتی کوردستان سنوری نی‌یه.
دوکتور قاسملو به چڕووپڕێ به‌‌رنامه‌کانی خۆی بۆ تێرۆریستان باس ده‌‌کا. به‌‌ڵام صحرارودی ده‌کشێته په‌‌راوێزه‌وه و ده‌ڵێ:
” مه‌سه‌‌له ئه‌وه‌یه که باسه‌که‌مان له ده‌وری ئه‌م مه‌سه‌له‌‌یه‌دا بخولێته‌وه که پێوه‌ندیی حیزبی دێموکراتی کوردستان و کۆماری ئیسلامیی چۆن بێ؟ تۆ ده‌زانی ئێستا شه‌ر و توندو تیژیی له ئارادایه. ئه‌وه یه‌که‌مین بابه‌تی وتووێژی ئێمه‌یه. دووهه‌م، حدکا ده‌‌یه‌وێ جێی خۆی و هه‌ڵوێسته‌کانی بپارێزێ، له هه‌مان کاتدا له‌‌گه‌‌ڵ کۆماری ئیسلامیی وتووێژ بکا. من دڵنیام ئه‌وه قبوڵ ناکرێ. ئه‌گه‌ر حیزبی دێموکراتی کوردستانی ئێران ده‌یه‌‌وێ که‌‌ش و هه‌واکه بگۆرێ، ده‌بێ له‌گه‌ڵ کۆمه‌ڵگای ئێران تێکه‌ڵ بێ و ریشه‌‌داکوتێ.”
( واته چه‌ک دابنێ و ئه‌‌ماننامه ‌وه‌ربگرێ. کارێک که عه‌بدوڵلا حسن زاده کردی. ئه‌ماننامه‌ی پاراستنی گیانی پێشمه‌رگه‌و کادره‌کانیشی که به پێێ قه‌راردی 4/8/1996که‌ تاڵه‌بانی ده‌سته‌به‌ری کردبوو ، ده‌به‌یان له‌گه‌ل کرد،به‌رێوه‌یان نه‌برد و به سه‌تان کادریشیان له حدکا تێرۆر کرد. بڕوانه لیستی تێڕۆرکراوه‌ کان له کۆتایی ئه‌و وتاره‌دا. – وه‌رگێڕ
صحرارودی له درێژه‌ی قسه‌کانی دا ده‌لێ: ره‌نگه هێندێک بلێن له ئیسلام دا خودموختاری پێش‌بینی نه‌کراوه. هه‌موو ئه‌وشتانه‌ی ئێوه لێره باسی ده‌که‌ن که گۆیا خودموختاری یه‌کێتی ئێران پته‌و ده‌کا ته‌نیا تێئۆرییه‌که و به‌س. که‌سانێکی دیکه ده‌‌ڵێن ئه‌م پره‌نسیپه راست نییه به‌لکو پێچه‌وانه‌که‌ی راسته.
قاسملوو له درێژه‌‌ی قسه‌کانیدا ده‌ڵێ: ” ناتوانێ بۆچوونی لایه‌نه‌کانی قبووڵ بکا”:” ئێوه ده‌ڵێن گرێی بنه‌‌ڕه‌تی له‌م کاته‌دا، دیتنه‌‌وه‌ی رێگای پێوه‌ندیی حیزبی دێموکراتی کوردستانی ئێران و کۆماری ئیسلامیی‌یه، نه چاره‌سه‌ریی مه‌‌سه‌‌له‌‌ی خودموختاریی. ئه‌وه نه‌زه‌ری ئێوه‌یه. ئێمه پێێ رازی نین. ئێمه بۆ ئه‌و مه‌به‌سته نه‌‌هاتووینه ئێره. مه‌به‌ستی ئێمه لێره ، ئه‌وه‌یه که له ئێوه به ناوی نوێنه‌رانی ره‌سمیی کۆماری ئیسلامیی ئێران داوابکه‌ین. ئه‌سڵی خودموختاریی قبووڵ کراوه، رێگا چاره‌یه‌کی بۆ وه‌به‌رچاو بگێرێ.
به‌پێی ئه‌و وته‌یه‌ی دوکتور قاسملوو که له‌و دانیشتنه‌دا کردوویه، وادیاره ده‌ڵاڵی نێوبژی‌که‌ر بۆ رکێش کردنی دوکتور قاسملوو بۆ نێو تۆڕی تێڕۆر، به دوکتور قاسملووی راگه‌یاندبێ که رژیمی کۆماری ئیسلامیی خودموختاریی قبووڵ کردووه. “وه‌رگێڕ ح.ا”‌
د. قاسملوو به درێژه له‌سه‌ر دیاریکردنی مافی چاره‌نووس که ده‌کرێ شکڵی جۆراوجۆری سه‌ربه خۆیی، فیدراڵیی و خودموختاری هه‌بێ باس ده‌کا. ئه‌و ده‌یه‌وێ بزانێ که ئایا کۆماری ئیسلامیی خوازیاری چاره‌‌سه‌رکردنی مه‌‌سه‌له‌ی نه‌‌ته‌وه‌کانه یاننا؟
دوکتور له درێژه‌ی وته‌که‌یداده‌‌ڵێ:”
ئه‌‌گه‌ر وه‌‌ڵامه‌‌که‌ به‌ڵێ، بێ ده‌مانه‌وێ بزانین چۆنی چاره‌سه‌رده‌که‌ن ؟ سه‌ربه‌خۆیی ، فێدرالیی یان خودموختاریی؟ ئه‌گه‌ر ئێوه له‌گه‌ڵ “خودموختاریی” که لانی که‌مه رێک نه‌که‌‌ون به‌رنامه‌یه‌کتان بۆ دۆزینه‌وه‌ی رێگاچاره‌ی مه‌‌سه‌له‌ی نه‌ته‌وه کان نییه.
قاسملوو ده‌ڵێ:
” ئێمه بۆ دیاریکردنی پێوه‌ندیی‌یه‌کانمان لێره کۆ نه‌بووینه‌وه. نه‌بوونی پێوه‌ندیی باش ئاکامی به‌‌شێک ناکۆکیی‌یه. یه‌کێ له‌و مه‌سه‌لانه گرفتی نه‌ته‌ویی‌یه که له چوارچێوه‌ی خودموختاریدا چاره‌‌‌سه‌ر ده‌کرێ…
بێ چاره‌سه‌ریی مه‌سه‌له‌ی کورد له ئێراندا، بێ چاره‌‌سه‌رکردنی مه‌سه‌له‌ی میللی هیچ کاتێ حیزبی دێموکراتی کوردستانی ئێران له‌ته‌‌نیشت خۆتان دا نابینن. ته‌نانه‌ت ئه‌گه‌ر من یان رێبه‌رانی ئێستاش نه‌بین، هه‌میشه ئه‌و گرفته‌تان هه‌ر ده‌بێ.( دوکتور قاسملوو پێی وانه‌بوو دوای تێرۆری خۆی جێنشینه به وه‌جه‌که‌شی نامێنێ، ده‌نا ده‌یزانێ پاش ئه‌و” نه‌ از تاک نشان ماند و نه از تاک نشان” نه‌ حیزب ده‌مێنێ و نه‌ ئاسه‌واری حیزب”. وه‌رگێر ح.ا )
کریس کۆچرا ده‌نووسێ:
پاش وتووێژێکی کورت لایه‌نه‌کان دیدارێکی دیکه بۆ رۆژێکی دیکه دیاری ده‌که‌ن. زۆری پێناچێ ده‌نگی چوارگوڵله له چه‌کێکی ده‌نگبر و ئیتر هیچ.
دوکتور قاسملوو مێشکی بزووتنه‌وه‌ی کورد له رۆژهه‌ڵاتی کوردستان، له پشتی میزی وتووێژ به گوولله‌ی ‌صحرارودی و به ده‌ستوری راسته‌وخۆی ره‌فسه‌نجانیی و تیمه‌ تایبه‌تیی‌یه‌که‌ی که مصباحی ،شاهیدی ” س” له دادگای میکونوس‌دا ئاشکرای کرد کوژرا.
کۆچرا له وتاره‌که‌ی‌دا نووسیبووی:” به کوژرانی دوکتور قاسملوو، دوکتور شه‌ره‌فکه‌ندی بوو به سکرتێری حیزبی دێموکراتی کوردستانی ئێران. روناکبیرێک بوو به جێنشینی رووناکبیرێکی دیکه.”
کۆچرا ده‌نووسێ :” دوکتور سه‌‌‌عید ( شه‌ره‌فکه‌ندی) له کاتێکی زۆر ئه‌سته‌م دا بوو به جێنشینی که‌‌سایه‌تیی‌یه‌کی ده‌گمه‌ن. دوکتور سه‌‌عید رووی کرده کاری سازماندانی حیزبه‌که‌ی، بۆ ئه‌‌وه خوێنیکی تازه بداته جه‌سته‌ی حدکا و درێژه بدا به خه‌باتی سیاسیی – نیزامیی له‌سه‌ر بنه‌ماو‌‌ پێوه‌ری ئه‌مرۆیی.
دواتر کۆچرا ده‌نووسێ: دوکتور شه‌ره‌فکه‌‌ندیی به هه‌لبژاردنی مصطفی هجری، باباعه‌‌لی مێهرپه‌روه‌ر،حسن شرفی سلام عزیزی و دوور خستنه‌وه‌ی مه‌لا عه‌بدولا حسن زاده له ده‌وروبه‌ری ده‌فته‌ری سیاسی روحێکی نوێی خسته نێو له‌شی حدکاوه . پێشمه‌رگه له گروپی چه‌‌ند که‌سیی پچوکی چالاک و توندوتۆڵ که له هه‌موو شوێنێکی کوردستاندا ده‌گه‌رێن و کادره‌کان له گروپ و تاقمی 4 که‌سیدا به شه‌و ده‌‌چنه نێو گونده‌کان و له‌گه‌‌ل خه‌لک ده‌دوێن به‌یانان له گونده‌کان وه‌ده‌رده‌که‌ون. پێشمه‌رگه‌ی له‌‌ژماره‌ی 100 که‌سیدا، بۆ چالاکیی مه‌زن و چاندنی مین له جاده‌کان و ده‌سرێژ کردن له ستوونه نیزامییه‌کان ده‌ستی خۆیان له دوژمن ده‌وه‌‌شێنن.
شه‌ره‌فکه‌ندیی ده‌ڵێ: “ده‌مانه‌وی رژیم بروخێنین. ده‌شزانین ئه‌وه له‌و هه‌لومه‌رجه‌دا نالوێ. ده‌بێ عه‌مه‌لیاتی نیزامی هه‌ر درێژه‌‌بده‌ین. بۆ ئه‌وه نیشان بده‌ین که له مه‌یدانی کرده‌وه‌دا ئێمه‌‌ هه‌ین. کێ ده‌ڵی ئه‌م رژیمه ساڵه‌یلێ ده‌مێنێ؟
جێگره‌کانی دوکتور قاسملوو و پره‌نسیپ
کوژرانی دوکتور شه‌ره‌فکه‌ندیی 17. سێپتامبری 1992
گوندنشینه‌کانی ده‌وروبه‌ری قه‌ندیل بۆ کۆکردنه‌وه‌ی خه‌به‌ر بۆ کۆماری ئیسلامیی له زیادبوونن. شه‌ره‌فکه‌ندیی له‌وه نیگه‌رانه. ده‌بیری گشتی ده‌زانێ که ماوه‌‌یه‌کیان بۆ زیندوومانه‌وه‌ی ئه‌و وه‌‌‌به‌رچاو گرتووه. له‌ورووه‌وه که‌سێک بۆ جێنشینیی خۆی هه‌لده‌بژێرێ. زۆری پێناچی له برلێن تێرۆر ده‌کرێ.
مصطفی هجری جێنشینی شه‌ره‌فکه‌ندیی ده‌چێته ئه‌مریکا و بریتانیا. رۆژی 18ژوئییه 1993 مه‌لا عه‌بدوللا حسن زاده جێگری هجری له کوێستانی قه‌ندیل داده‌به‌زێ و به‌ره‌و ده‌شتێ کۆیه داده‌خزێ.
( ئه‌و دابه‌زینه له کوێستانی قه‌ندیل و جێگیربوونی له گه‌رمه‌سێری کۆیه، سه‌ره‌تای ئاشبه‌تاڵ و توناکردنی بزووتنه‌وه‌ی کورد له رۆژهه‌ڵاتی کوردستان و مه‌رگی سیاسیی رێبه‌رانی پاش دوکتور قاسملوو دوکتور شه‌ره‌فکه‌ندیی‌ بوو- وه‌رگێڕ)

لە ماڵپەڕی نووسەر/ ڕۆژی کورد/ وەرگیراوە

Advertisements

تاگەکان: , , , , , ,

وەڵامێک بنووسە

Fill in your details below or click an icon to log in:

WordPress.com Logo

You are commenting using your WordPress.com account. Log Out / گۆڕین )

Twitter picture

You are commenting using your Twitter account. Log Out / گۆڕین )

Facebook photo

You are commenting using your Facebook account. Log Out / گۆڕین )

Google+ photo

You are commenting using your Google+ account. Log Out / گۆڕین )

Connecting to %s


%d هاوشێوەی ئەم بلۆگەرانە: