تیرۆری د. قاسملوو له‌ زمان چه‌ند شایه‌دحاڵێکه‌وه‌

ئاماده‌کردن و وه‌رگێڕانی: که‌ریم مه‌ره‌سه‌نه/ ڕێنێسانس نیوز(وێبنووسی کاتی)
رۆژی سێزده‌ی جولای 1989، سکرتێری پێشووتری حیزبی دێموکراتی کوردستانی ئێران، د. عه‌بدولڕه‌حمانی قاسملوو، له‌ ڤیه‌نی پێته‌ختی ئوتریش، له‌ کاتی دانوستاندا له‌گه‌ڵ گرووپێک “دیپلۆمات”ی ئێرانی، تیرۆر کرا. سه‌رکرایه‌تیی ئه‌وکاتی حیزبی دێموکراتی کوردستانی ئێران، هه‌رچه‌ند له‌ سه‌ره‌تاوه‌ زانیارییه‌کی ئه‌وتۆی له‌مه‌ڕ ورده‌کاریی دانوستانه‌کان نه‌بوو، به‌ڵام خێرا په‌نجه‌ی تاوانی بۆ لای کۆماری ئیسلامی ڕاکێشا. سه‌رچاوه‌کانی نزیک له‌ حیزبی دێموکرات ئه‌و کات وایان بڵاو کرده‌وه‌ که‌ بکوژانی د. قاسملوو و وهاوڕێیانی، به‌ پاسپۆرتی دیپلۆماسی و له‌سه‌ر ده‌ستی باڵوێزخانه‌ی کۆماری ئیسلامیی ئێڕان ڕه‌وانه‌ی ئێران کراونه‌وه‌. ده‌وڵه‌تی ئوتریش، که‌ تا ئێستاش به‌هۆی که‌مته‌رخه‌میی له‌ لێکۆڵینه‌وه‌ی ئه‌و دۆسییه‌یه‌دا ڕه‌خنه‌ی لێده‌گیرێ، ڕایگه‌یاندووه‌ که‌ هیچ به‌ڵگه‌یه‌کی حاشاهه‌ڵنه‌گری له‌ده‌ستدا نییه‌ که‌ بانگه‌شه‌کان پشتڕاست بکاته‌وه‌ و به‌و هۆیه‌وه‌ش بکه‌رانی ئه‌و تاوانه‌ نێوده‌وڵه‌تییه‌ تا ئێستاش سزا نه‌دراون.

یه‌که‌مجار، شانزه‌ ساڵ دوای تیرۆره‌که‌ و له‌ ساڵی 2005دا، رۆژنامه‌نووسێک که‌ ئێستا به‌ “شایه‌دحاڵی D ” ناسراوه‌، له‌ ماڵی یه‌که‌م سه‌رکۆماری ئیسلامیی ئێڕان ـ ئه‌بولحه‌سه‌نی به‌نی سه‌در ـ له‌ فه‌ڕانسه‌، چاوی به‌ نوێنه‌ری پارتی سه‌وزی ئوتریش “پیته‌ر پیڵز” که‌وت و له‌ دیداره‌که‌یدا ئاشكرای کرد: “یه‌کێک له‌ ئه‌ندامانی ئه‌و گرووپه‌ی ساڵی 1989 پیلانی کوشتنی قاسملوو و هاوڕێیانی پێکهێناوه‌، لاوێکی پاسدار بووه‌ به‌ ناوی مه‌حموودی ئه‌حمه‌دی نه‌ژاد” …

به‌ گوێره‌ی قسه‌کانی “D ” ئه‌حمه‌دی نه‌ژاد یه‌کێک بووه‌ له تیمێکی چوار که‌سی که‌ به‌رپرس بوون له‌ دابینکردنی تفاق و به‌ڕێوه‌بردنی پراکتیکی هێرشه‌که‌. وه‌ک شایه‌دحاڵه‌که‌ گوتوویه‌تی: ئه‌حمه‌دی نه‌ژاد چه‌کی دابینکردووه‌ و رۆڵی “هێزی پشتیوان”یشی هه‌بووه‌. وا شیمانه‌ ده‌کرێ که‌ ناوبراو له‌ شوێنی ڕووداوه‌که‌ بووبێ و به‌ موتورسیکلیش یه‌کێک له‌ هێرشکاره‌ برینداره‌کانی ڕزگار کردووه‌.

رۆژنامه‌نووس جۆرج هۆففمان ـ ئۆسته‌نهۆف، که‌ ساڵی 2005 شایه‌دحاڵه‌که‌ی به‌ ته‌له‌فۆن دواندووه‌، سه‌باره‌ت به‌ ڕووداوه‌که‌ ده‌نووسێ: “یه‌کێک له‌ هێرشبه‌ره‌کان، که‌ به‌ گشتی چوار که‌س بوون، بریندار بووه‌ و له‌لایه‌ن دوو که‌سی دیکه‌وه‌ ڕاکێشی نێوان دوو ترومبێلی ڕاگیراو ده‌کرێ، له‌ چه‌ندین شوێنه‌وه‌ برینداره‌ و خوێنی لێ ده‌تکێ. یه‌کێک له‌ ئه‌ندامانی گرووپه‌که‌ به‌ موتورسیکل ده‌گاته‌ شوێنه‌که‌ و برینداره‌که‌ له‌ پشت خۆی سوار ده‌کا و به‌ توندی له‌ شوێنه‌که‌ دور ده‌که‌وێته‌وه‌.”

هه‌روه‌ها نووسیویه‌تی که‌ “شایه‌دحاڵه‌که‌ رۆژنامه‌نووسێکی ئێرانییه‌ که‌ نایه‌وێ ناوی خۆی ئاشكرا بکات، ئه‌و ده‌ترسێ. ماوه‌یه‌ک به‌ر له‌ ئێستا ئه‌فسه‌رێکی سوپای پاسدارانی ئێران به‌ ناوی ناسری ته‌قی پوور، به‌ر له‌وه‌ی به شێوه‌یه‌کی گوماناوی “بمرێ”، ‌له‌لای D دانی به‌وه‌دا ناوه‌ که‌ خۆی یه‌کێک بووه‌ له‌ بکوژانی د. قاسملوو و ئه‌حمه‌دی نه‌ژادیش یه‌کێک بووه‌ له‌ ئه‌ندامانی ئه‌و تیمه‌ کۆماندۆیه‌ که‌ تیرۆره‌که‌یان پێکهێناوه‌.

کورته‌یه‌کی وتووێژی جۆرج هۆففمان ئۆسته‌نهۆف له‌گه‌ڵ شایه‌دحاڵه‌که‌

ئۆسته‌نهۆف: چۆن بوو که‌ ناسری ته‌قی پوور ویستی له‌گه‌ڵ تۆ قسه‌ بکات له‌سه‌ر ڕووداوه‌که‌ی ڤیه‌ن؟
دی: ئه‌من له‌ کۆنه‌وه‌ ته‌قی پوورم ده‌ناسی، ئه‌و دۆستێکی بنه‌ماله‌ییمان بوو. ئه‌و چاودێریی ڕێڕه‌وی پێگه‌یشتنی منی ده‌کرد: ئه‌و کات که‌ ده‌مخوێند، که‌ بوومه‌ رۆژنامه‌نووس. ئێمه‌ به‌ ڕاستی لێک نزیک بووین. ئێمه‌ به‌رده‌وام یه‌ک یان دوو جار له‌ مانگێکدا یه‌کترمان ده‌دیت و باسی بابه‌تی رۆژمان ده‌کرد.

ئۆسته‌نهۆف: ئایا ئه‌و کاتیش بابه‌تگه‌لی هه‌ستیارتان باس ده‌کردن؟
دی: له‌مێژه‌وه‌، ته‌قی پوور وه‌فادار بوو به‌ حکوومه‌ت. ئێمه‌ زۆر جار وه‌ک یه‌ک بیرمان نه‌ده‌کرده‌وه‌. ئه‌و هه‌ر له‌سه‌ره‌تای دامه‌زرانیه‌وه‌ زۆر ئاکتیڤ بوو له‌ سوپای پاسداراندا. ئه‌و به‌هایانه‌ی ڕێگایان له‌ پێش شۆڕش کرده‌وه‌ زۆر گرینگ بوون بۆ ئه‌و.

ئۆسته‌نهۆف: ئه‌و کاته‌ که‌ بابه‌تی کوشتنی کورده‌کانی بۆ تۆ باسکرد چ پله‌یه‌کی هه‌بوو له‌ سوپای پاسداراندا؟
دی:  ئه‌و “سه‌ردار پاسدار” بوو. ئه‌وه‌ پله‌یه‌کی ئیسلامییه‌. شتێکی گشتییه‌.

ئۆسته‌نهۆف: په‌یوه‌ندیی له‌گه‌ڵ سه‌رکردایه‌تیی سیاسیی وڵاتدا هه‌بوو؟
دی: ئه‌و دۆستێکی نزیکی کوڕی سه‌رکۆماری پێشوو هاشمی ڕه‌فسه‌نجانی بوو.

ئۆسته‌نهۆف: ته‌قی پوور که‌ی ئه‌و بابه‌ته‌ی بۆ تۆ باسکرد؟
دی: ساڵی 1380 به‌ رۆژژمێری ئێرانی. سێ ساڵ و نیو به‌ر له‌ ئێستا (سێ ساڵ و نیو به‌ر له‌ ساڵی 2005 که‌ وتووێژه‌که‌ی تێدا کراوه‌. تێبینیی وه‌رگێڕی کوردی)

ئۆسته‌نهۆف: پێتوایه‌ ئه‌و بۆ ڕاست ئه‌تۆی هه‌ڵبژارد بۆ ئه‌و بابه‌ته‌، بۆ که‌سێکی دیکه‌ نا؟
دی: ئه‌منیش ئه‌و کات ئه‌وه‌م لێ پرسی. ئه‌و دوو هۆی پێ گوتم. گوتی”یه‌که‌م چوونکه‌ من و تۆ له‌ منداڵییه‌وه‌ یه‌کتر ده‌ناسین، ئه‌من باوه‌ڕم به‌ تۆیه‌. دووهه‌م چوونکه‌ تۆ رۆژنامه‌نووسی. ئه‌گه‌ر ئه‌و زانیارییه‌ رۆژێک بڵاو بکرێته‌وه‌، ئه‌تۆ ده‌زانی چۆن و له‌ کوێ، چوونکا‌ تۆ مه‌یدانه‌که‌ ده‌ناسی.

ئۆسته‌نهۆف: یه‌کتر دواندنه‌که‌ له‌ کوێ بوو و له‌ چ که‌ش و هه‌وایه‌کدا؟
دی: من له‌ نزیک شوێنی کاری ئه‌و ده‌ژیام، ته‌له‌فۆنی بۆ کردم، ده‌یویست قسه‌م له‌گه‌ڵ بکا، لێم پرسی که‌ یه‌کسه‌ر بچمه‌ شوێنی کاره‌که‌ی، به‌ڵام گوتی نا من دێمه‌ ماڵی باوکت. ئیتر له‌وێ یه‌کترمان دیت دوای کاتژمێر ده‌ی شه‌و. سه‌ره‌تا یه‌ک سه‌عات باسی کۆمه‌ڵیک بابه‌تی دیکه‌ی کرد، هه‌ستم ده‌کرد هێندێک گرژ و ئاڵۆزه‌. ئه‌کات لێم پرسی ده‌یه‌وێ چیم پێ بڵێ: خۆ بۆ چه‌ند قسه‌یه‌کی هاکه‌زایی بانگی نه‌کردووم: “ئه‌من چاوه‌ڕوانی ئه‌رکێکم و ده‌بێ سه‌فه‌ر بکه‌م. ئه‌گه‌ر هاتمه‌وه‌ ده‌بێ په‌یمانم پێ بده‌ی که‌ هه‌موو ئه‌و شتانه‌ی گوێط لێ ده‌بێ له‌بیر بکه‌ی. به‌ڵام ئه‌گه‌ر شتێکم به‌سه‌ر هات ده‌توانی زانیارییه‌که‌ بلاو بکه‌یه‌وه‌.” دواتر گوتی: “ئه‌گه‌ر وا بکه‌ی که‌ من پێت ده‌ڵێم، هیچ کێشه‌یه‌کت نابێ.”

ئۆسته‌نهۆف: ئیتر باسی کوشتنه‌که‌ی بۆ کردی. بۆچی؟ ده‌یویست که‌سێک بریندار بکا (تاوانبار بکا. وه‌رگێڕ) یان ده‌یویست ئه‌و شته‌ له‌ دڵی ده‌رباوێ؟
دی: ئه‌من نه‌مده‌زانی بۆچی ئه‌وه‌م پێ ده‌ڵێ. دواتر تێگه‌یشتم ئه‌و ده‌یه‌ویست چی بڵێ. پێموایه‌ ئه‌و به‌و ئه‌نجامه‌ گه‌یشتبوو که‌ ڕژیمه‌که‌ سوپای پاسداران و سوپای قودسی کردبوو به‌ ئامرازێک. ئه‌و هه‌ستی به‌وه‌ ده‌کرد که‌ به‌جۆرێک خه‌ڵه‌تێنراوه‌.

ئۆسته‌نهۆف: ئه‌و کاتی که‌ ته‌قی پوور شته‌که‌ی بۆ تۆ باسکرد، باوه‌ڕیئ وابوو که‌ مافی خۆی بوو  قه‌تڵه‌کانی ڤیه‌ن پێک بێنێ؟
دی: باوه‌ڕ ناکه‌م، ئه‌و هه‌ستی به‌ په‌شیمانی دکرد. ده‌نا باسی نه‌ده‌کرد.

ئۆسته‌نهۆف: ئایا ئه‌و پاته‌وپات گوتی که‌ ئه‌حمه‌دی نه‌ژاد به‌شدار بووه‌ له‌ تیمی کۆماندۆی پێکهێنانی چالاکییه‌که‌دا له‌ ڤیه‌ن؟
دی: چه‌ند جار ناوی وی هێنا.

ئۆسته‌نهۆف: ئه‌تۆ ڕاپۆرتێکی نووسراوت داوه‌ به‌ سه‌رکۆماری پێشووتری ئێران [ئه‌بولحه‌سه‌ن] به‌نی سه‌در، که‌ ئێستا له‌ دیاسپۆرایه‌ له‌ پاریس و دژبه‌ری ڕژیمه‌. به‌ڵام ناوی ئه‌حمه‌دی نه‌ژاد له‌و ڕاپۆرته‌دا نه‌بوو.
دی: ئه‌وه‌ ڕاپۆرتێکی گشتی بوو و له‌گه‌ڵ به‌نی سه‌در پێکهاتبووین که‌ ناوی که‌سی تێدا نه‌بێ.

ئۆسته‌نهۆف: به‌ڵام چه‌ند ناو له‌ راپۆرته‌که‌دا هه‌ن.
دی: ته‌نیا ناوی ئه‌و که‌سانه‌ هه‌یه‌ که‌ پێشتر ناسراون. که‌سانی دیکه‌ش هه‌ن که‌ من ناوم نه‌هێناون بۆ ئه‌وه‌ی ناسنامه‌ی خۆم ئاشکرا نه‌که‌م. ….

به‌شی دووهه‌می ئه‌م ڕاپۆرته‌ که‌ ورده‌کاریی قسه‌کانی شایه‌دحاڵێکی دیکه‌ی تێدایه‌ که‌ باسی به‌شداریی ئه‌حمه‌دی نه‌ژاد ده‌کا له‌ پیلانه‌که‌دا
چاوه‌ڕوان بن

ـــــــــــــــــــــــــــــــــــــــــــــــــــــــــــــــــــــــــــــــــــــــــــــــ

تێبینی: ئه‌و وتووێژه‌ی جۆرج هۆففمان ئۆسته‌نهۆف  زۆر دوور و درێژتره‌، به‌ڵام من هه‌موویم وه‌رنه‌گێڕاوه‌. هه‌روه‌ها جێگای ئاماژه‌یه‌ که‌ وتووێژه‌که‌ ساڵی 2005 به‌ زمانی ئه‌ڵمانی چاپ کراوه‌ و رۆژنامه‌نووس “جۆن روسه‌نداڵ” کردوویه‌تی‌ به‌ ئینگلیزی و منیش له‌وم وه‌رگرتووه‌. به‌شێکی دیکه‌ی ئه‌و وتووێژه‌ له‌ به‌شی داهاتوودا بڵاو ده‌بێته‌وه‌.

Advertisements

وەڵامێک بنووسە

Fill in your details below or click an icon to log in:

WordPress.com Logo

You are commenting using your WordPress.com account. Log Out / گۆڕین )

Twitter picture

You are commenting using your Twitter account. Log Out / گۆڕین )

Facebook photo

You are commenting using your Facebook account. Log Out / گۆڕین )

Google+ photo

You are commenting using your Google+ account. Log Out / گۆڕین )

Connecting to %s


%d هاوشێوەی ئەم بلۆگەرانە: