نووسین به‌ گه‌ز، داهێنان به‌ کیلۆ، بەرهەم به‌ گۆتره‌/ بەڕۆژ ئاکره‌یی/ سایتی هەولێر

گاڵته‌ ناکه‌م.
بێ ڕێزی و بچووک کردنه‌وه‌ی خه‌ڵک و که‌سانیش، هه‌وڵده‌ده‌م هه‌رگیز.

به‌ڵام:
مرۆ، به‌ هه‌ر زمانێک که‌ بدوێ و بنووسێ، ده‌نووسێ و ده‌دوێ تا کو ببیسرێ و بخوێنرێته‌وه‌ و له‌ ئاکامدا: فام بکرێ.

«بلیمه‌تی له‌وه‌دایه‌ ئالۆزترین بیر و ئه‌ندێشه‌کان، به‌ زمانێکی ساده‌ و ڕه‌وان ده‌رببڕین، نه‌ک به‌ پێچه‌وانه‌وه‌!».

که‌واته‌: په‌رده‌ی درۆ و ئه‌م مه‌سڵه‌ته‌ی بۆته خه‌سڵه‌ت‌، ته‌نانه‌ت بۆ تاوێکیش (ئه‌گه‌ر نەیاندڕین) دەتوانین لایانبدەین و له‌ حاڵ و بازاری قه‌ڵه‌م و نووسین و کتێبی کوردی بڕوانین.

کەس هەیە بپرسێ: ئه‌م هەموو به‌ ڕادان نووسین و به‌ ڕادان بڵاوکردنه‌وه‌ و به ‌ڕادان وه‌حه‌واخستن و بە ڕادان وەحەواکه‌وتن و که‌س له‌که‌س حاڵی نه‌بوون و به‌ هه‌ڵه‌ جووتباقیه‌بوون و به‌ هه‌ڵه‌ دژ به‌ یه‌کبوونه،‌ لەم حوجرەدا که‌ی ته‌واو ده‌بێ؟ چی نووسین و چی گوتن و چی وه‌عزدان و چیه‌کانی دی.. که‌ی ده‌بن به‌: چۆن نووسین و چۆن گوتن و چۆن وێناکردن؟

به‌ڵێێێێێێێ! (مەلا شوکر گوتەنی)
رۆمانی زل و کتێبی ئه‌ستووری وامان هه‌ن، ملی گا دەپەڕێنن. لێ هەر ئەم کتێبە ملپەڕانە، ته‌نانه‌ت لاپه‌ڕه‌یه‌کیشیان گه‌ر پێنووسەکەتیان لێ نەکەیتە بولدۆزەر و‌ ڕێگای به‌رچاو و زەینتی بۆ خۆش نه‌که‌یت و ‌ئاره‌قه‌ی شین و مۆر ده‌رنه‌که‌یت و خۆت تووشی قوززەلقورت نەکەیت، بۆت ناخوێنرێنه‌وه‌. هەر ئەم بەناو کتێبانە، ئەگەر خۆت داوی فەنتازیای خۆتی بۆ بەر نەدەیت و لە خورتوخۆڕاییەوە هەڵینەفڕێنیت، تۆی بەستەزمان نا، شەیتانیش نازانێت مه‌به‌ستی نووسه‌ر چی بووه لە نووسینەکەیدا‌.

کێشه‌که‌یش، هیچ کێشه‌ی‌ بۆچوون و بیر و ئایدیا و تێڕوانین و ته‌فه‌لسوف‌ نییه‌.‌ نەخێر! زمانی هه‌ڵه‌ و ڕێنووسی په‌ڵه‌ و دیالۆگی تەتەڵە و مۆنۆلۆگی هه‌رزه‌کارفریودەر و هه‌رزان‌‌ (که‌ له‌ ده‌م و کاوێژ و که‌سایه‌تیی که‌س و وەگێڕ و بنووسه‌کانی ناو نووسینەکان ناوه‌شێنه‌وه‌) ئه‌ده‌بی ئێمەی به‌رەو ئاقاری بێ ئەدەبییەک بردووە کە ئەمرۆ بەداخەوە، پێی دەگوترێ ئەدەبی کوردی. کەس نییە هەستێتە سەرپێ و دەنگ هەڵبڕێ: ئەرێ ئەم هەموو ناوی گران و گوندی وێران و قازی بازاری له‌ پشت ملی یه‌کتردان و نان به‌ قه‌رزدان و وشە‌فڕکێنه‌ی نێو گرووپه‌ به‌ناو فیکریی و ئه‌ده‌بییه‌کان، بەرەو کوێمان دەبەن؟
با درۆ له‌گه‌ڵ یه‌کتردا نه‌که‌ین! ئه‌م ده‌هۆڵه‌، دەمێکە، سه‌د مخابن، له‌ دووریشه‌وه‌ ده‌نگی ناخۆش و ناقۆڵایە!
له‌م بیست ساڵه‌ی دواییدا که‌ وشه‌ی کوردی (به‌ناو) ئازادتر کراوه‌ و بەرداشی میدیای حیزبەکان و سیاسه‌تەکان و مه‌سڵه‌تی کەس و ناکەسانی پێ گه‌ڕاوه‌، هەزاران کتێب و گۆڤار و نامیلکه‌ و ڕۆمان و دیوانی خستۆتە به‌ر ده‌ست و چاومان. هێندێک له‌و کتێب و به‌رهه‌مە بەستەزمانانه‌ هەر بە گۆترە و لە قودرەتی قادرەوە خه‌ڵات کراون و نازناوی سه‌یروسەمەرەشیان پێ ڕه‌وا بینراوه‌. که‌چی تاقه‌ به‌رهه‌مێک له‌و هه‌موو زۆرە، نه‌ک له‌ جیهانی دووری ده‌ره‌وه‌، ته‌نانه‌ت له‌ گۆڕه‌پانی ئه‌ده‌بی وڵاتانی دراوسێشدا بۆرە ده‌نگێکیان نه‌داوه‌ته‌وه‌.

هه‌ڵبه‌ت، ئەوەمان لە بیر نەچێت کە: ئێمه‌ گه‌لێکی گه‌لێک لێقه‌وماو و خاوه‌ن پشوو و به‌ که‌م ڕازین.

دڵمان گەلێک جار به‌وه‌ خۆش بووه‌ که‌ چه‌ند به‌رهه‌مێکمان وه‌رگێڕدراونه‌ته‌ سه‌ر زمانه‌کانی تر و لە پشت بەرگی کتێبە ئەستوورەکانمان درۆی زل زلیش دەنووسینەوە کە گوایە فڵانەکەس فەرموویەتی: “ئەگەر دە ڕۆمانی گەورەی جیهان دەستنیشان بکەم، چواریان هی فڵانە کەسە؟!” ئێمە داوێک دەنێینەوە تا خۆمانی پێ نێچیر بکەین و ناهێڵین بیرمان بۆ ئەوە بچێت، کە ئەگەر ئەم قسانە ڕاستن، دەبێ ئەو زاتە، چوار بەرهەمەکەی ئێمەی بەستەزمانی بە چ زمانێک خوێندبێتەوە؟ عەرزمان لە ژێر پێدایە و خۆمان گەزمان لە خۆمان شاردۆتەوە.

بیریش قه‌ت له‌وه‌ نا‌کەینە‌وه، کە بزانین به‌رهه‌مه‌کانمان‌ له‌ زمانی دووهەمدا، چ سه‌رنجێکی لای چ که‌سانێک ڕاکیشاوه‌.

کەواتە:

قوربان!
جه‌نابتان گاڵته‌ ده‌فه‌رموون. رۆمانی فه‌لسه‌فی ئه‌و کتێبه‌ ئه‌ستووره‌ نییه‌ که‌ له‌ فه‌لسه‌فه‌ ده‌دوێ و پاڵه‌وانه‌کانی به‌ زمانی یاجووج و ماجووجەکان ده‌فه‌لسه‌فێنن.

قوربان!
جه‌نابتان گاڵته‌ ده‌فه‌رموون. شیعری ئاشقانه‌ ئه‌و شیعره‌ نییه‌ پڕ بێ له‌ وشه‌ی گوڵ و ئه‌شق و ئازیز و ماچ و تاسه‌ و دایه‌گیان من غه‌ریبم.
قوربان!
جه‌نابتان گاڵته‌ ده‌فه‌رموون. شیعری ئیرۆتیک ئه‌و شیعره‌ نییه‌ که‌ ڕووبار و ئه‌شکه‌وت و دره‌خت و ئافره‌ت و گێزەر و باینجان و ڕووبار، هه‌ر له‌ خۆڕا، مه‌مکیان ده‌ر ده‌خه‌ن و ڕووت ده‌بنه‌وه‌.
قوربان!
جه‌نابتان گاڵته‌ ده‌فه‌رموون، که‌ شوێنی نوخته‌ و ویرگوڵ و ته‌نانه‌ت وشه‌ش له‌ ڕسته‌دا نازانیت و پێت وایه‌ بۆ خه‌ڵکی نووخبه‌ دەنووسیت.

قوربان!
جه‌نابتان گاڵته‌ ده‌فه‌رموون. نووخبه،‌ ئه‌گه‌ر نووخبه‌ بێ، له‌ خوێندنه‌وه‌شدا نووخبه‌یه نەک لە کاوێژدا.

قوربان!
جه‌نابتان گاڵته‌ ده‌فه‌رموون، که‌ براده‌رێکی خۆت ده‌که‌یته‌ عه‌فلاتوون تاکو خۆت ببیت به‌ سوکرات.

قوربان
جه‌نابتان گاڵته‌ ده‌فه‌رموون، که‌ ده‌توانن جۆرێک بنووسن که‌ شه‌یتانیش لێی حاڵی نه‌بێ.

قوربان!
جه‌نابتان گاڵته‌ ده‌فه‌رموون که‌ پێتان وایه‌: فیکر و فه‌لسه‌فه‌ و ئه‌ده‌ب و حیکمه‌ت، زمانیان تێدا گرینگ نییه‌.

قوربان!
بمبەخشن، بەڵام ئه‌و شتەی زمانی تێدا گرنگ نییه‌، ڕێک ئەو زوڕنایەیە‌ کە جەنابتان دەیژەنن!
قوربان!
جه‌نابتان گاڵته‌ ده‌فه‌رموون!
لە ئاوێنەدا!

 

Advertisements

تاگەکان: ,

وەڵامێک بنووسە

Fill in your details below or click an icon to log in:

WordPress.com Logo

You are commenting using your WordPress.com account. Log Out / گۆڕین )

Twitter picture

You are commenting using your Twitter account. Log Out / گۆڕین )

Facebook photo

You are commenting using your Facebook account. Log Out / گۆڕین )

Google+ photo

You are commenting using your Google+ account. Log Out / گۆڕین )

Connecting to %s


%d هاوشێوەی ئەم بلۆگەرانە: